Sápmi |

Sovkina ii bala – giitá sámiid veahkis

Sii geat ná láhttejit min vuostá ja hehttejit min searvamis dákkár čoahkkimii, sii dat ballet, Guoládaga sámi parlameantta ságadoalli Valentina Sovkina dajai maŋŋebárga New Yorkkas.

Valentina Sovkina
Valentina Sovkina ja Tiina Sanila-Aikio eamiálbmogiid máilmmikonferánssas New Yorkkas 2014. Govva: Berit Solveig Gaup / NRK

Guoládaga sámi parlameantta ságadoalli Valentina Sovkina ii bala máhccamis Ruššii eamiálbmotkonferánssa maŋŋá. Sovkina joavddai ikte New Yorkkii ja beasai oassálasttit máilmmikonferánssa nuppi beaivái, vaikke Ruošša boles geahččaliige eastadit su mátkki.

Vaikke lei váivves dáhpáhusas, Sovkina ii bala fas jorggihit ruoktot.

– Sii geat ná láhttejit min vuostá ja hehttejit min searvamis dákkár čoahkkimii, sii dat ballet. Mun in bala, go dovddan maid mun barggan, Sovkina dajai maŋŋebárgga New Yorkkas.

Sovkina giitá buohkaid

Valentina Sovkina hálida giitit buohkaid, geat leat leamašan dahkamušas su áššiin.

– Lea nu somá, ahte sápmelaččat ja earát leat jurddašan ja veahkehan mu. Máŋgasat leat riŋgen ja čállán munnje mátketelefuvnnain ja Facebookas ja media lea lokten ášši. Mun hálidan giitit das.

Sovkina oaivvilda, ahte su ášši lea buktán duođaid ovdan dan, ahte sámit leat okta álbmot.

– Dál lean duođaid beassan vásihit, ahte sámit leat okta álbmot, vaikke mii orrut iešguđet riikkain. Giitu!

Ruoŧa olgoministtar: Duođalaš ášši

Ruoŧa olgoministtar Carl Bildt dadjá Ruošša eamiálbmogiid mátkkiid hehttehusa duođalažžan ja sávvá Ruoŧa bargat dainna juoida.

– Ruoŧŧa lea ovdal gulahallan Ruoššain dán birra, ahte eamiálbmotovddasteaddjit galget beassat čoahkkimiidda. Mun šállošan hirbmasit jus Ruošša ii čuovo lohpadusaid.

Varrasamosat: Sápmi

Váldoođđasat

Varrasamosat

Muualla Yle.fi:ssä