Sápmi

Spiehkastatdilis dieđiheapmi sámegielain lea earenoamáš dehálaš – diehtu gal lea, muhto dat ii leat álkit gávdnomis

Saamelaiskäräjien kieliturvasihteeri Anne Kirste Aikio.
Sámedikki gielladorvočálli Anne Kirste Aikio muitala, ahte sámi giellaláhka ii leat koronapandemiija áigge ollašuvvan ollásit. Govva: Linda Tammela / Yle

Stáhtaráđi kansliija lea dán jagi borgemánu rádjái jorgalahttán sámegielaide 600 siiddu teavsttaid.

Govahala: leat mannamin koronavirustestemii, muhto it ádde, mii buohcceviesu uvssas čuožžu. Manat boastto sadjái, dohko, gosa ii leat lohpi mannat, jus lea eahpádus koronavirusnjoammumis.

Dat govahallan muitala das, ahte vearrámus dilis olmmoš sáhttá vaikkoba njoammudit dávdda earáide, go ii oaččo dieđu iežas eatnigillii pandemiijadilis. Danin livččii dehálaš, ahte eiseválddit čuovošedje sámi giellalága ja fuolahivčče dieđuid jorgaleamis nu olu go vejolaš. Eandaliige sámeguovllus diehtu galggašii leat sámegillii gávdnomis.

Sámedikki gielladorvočálli Anne Kirste Aikio muitala, ahte giellaláhka lea pandemiijaáigge dieđiheamis oasil ollašuvvan, muhto oasil fas ii.

– Dieđut galget leat sámegillii ja seammaáigásaččat, ja dat leat muhtun muddui ollašuvvan. Muhto ovdamearkka dihte sámeguovllu gielddain ii leat vealtemeahttumit leamaš ollenge dieđut korona birra neahttasiidduin, muitala Aikio.

Maiddái earáge virgeolbmuin diehtu leamaš oalle unnán ja dalle ii leat giellaláhka ollašuvvan dakkárin, go lea oaivvilduvvon.

Guđa geardde eanet jorgalusat, go diibmá

Stáhtaráđi kansliija giellabálvalusovttadaga hoavda Kaisa Kuhmonen muitala, ahte ministeriijat bivdet sis jorgalusaid. Go spiehkastatdilli giđđat álggii, dárbu jorgalusaide lei earenoamáš stuoris.

– Mis lea dakkár prinsihppa, ahte buot, mii guoská olbmuid dearvvašvuođa, árgaeallima ja ealáhusaid, galggašii jorgaluvvot maid golmma sámegillii, čilge Kuhmonen.

Valtioneuvoston kielipalvelujen tukiyksikön päällikkö Kaisa Kuhmonen
Stáhtaráđi kansliija giellabálvalusovttadaga hoavda Kaisa Kuhmonen muitala, ahte spiehkastatdili álggus jorgalusaide lei stuorra dárbu. Govva: Linda Tammela / Yle

Giđđat ovdamearkka dihte buot ráddjehusain ja mearrádusain almmustuvve dieđáhusat maiddái golmma sámegillii. Kuhmonen lohká, ahte dál dilli leamašan ráfálaš ja danin dieđáhusaidge ii leat leamaš dárbu jorgalit nu olu.

– Dilli orru goit rievdamen, de sihkkarit mii jorgalit fas lasi, son árvala.

Dán jagi sii leat Stáhtaráđi kansliijas jorgalan borgemánu álggu rádjái 600 siiddu materiála, go diibmá mearri lei dušše 100 siiddu.

Jorgaleames leat máŋggalágán hástalusat: spiehkastatdilis dilli sáhttá rievdat jođánit.

Dasa lassin Anne Kirste Aikio mielas eiseválddit eai lean ráhkkanan doarvái bures dákkár dillái, maid koronapandemiija dieđiheapmi namalassii sámegillii buvttii. Kaisa Kuhmonen lohkáge, ahte dalle go ráđđehus juo juoidá dieđihii, ii sis lean makkárge dieđáhusvuođđu dan várás.

Diehtu hiluid háluid, duoppil dáppil

Dieđut sámegielaide gal gávdnojit, muhto eai doarvái, iige doarvái álkit. Muhtumin dieđu galgá measta juo goaivut.

Ovdamearkka dihte Sámediggi lea gal čohkken iežas neahttasiidduide čoahkkáigeasu sierra gálduid koronadieđáhusain, muhto dan lea veadjemeahttun doallat áiggedásis.

Sámedikki gielladorvočálli Anne Kirste Aikio ávžžuha eiseválddiid ja ásahusaid bargat čielgasit ovdamearkka dihte neahttasiidduide liŋkkaid dahje lođáid, maid bokte buot sisdoallu livčče buoret gávdnomis.

Dát artihkal lea oassi Yle Sámi giellavahku sisdoaluin.

Varrasamosat

Muualla Yle.fi:ssä