Sápmi |

Spiehkastatlobiid guovžabivdui mieđihit eanet go ovdal

Guovžžaid oažžu borgemánus álgi bivdobajis goddit 40 proseatta eanet go mannan bajis.

Karhu kerää rasvakerrosta ennen painumistaan talviunille.
Karhu kerää rasvakerrosta ennen painumistaan talviunille. Govva: Tuomo Björksten / Yle

Suoma fuođđoguovddáš lea mieđihan 170 spiehkastatlobi guovžabivdui. Dasa lassin boazodoalloguovllus oažžu bivdit guovlodihtomeriid mielde 85 guovžža. Bivdobadji guovžabivdui álgá 20.8.

Eana- ja meahccedoalloministeriija lea ásahan dál álgi meahcástanjahkái 255 guovžža dihtomeari. Dat lea 72 guovžža eanet go diibmá. Boazodoalloguovllus sáhttet bivdit eanemustá 85 guovžža ja eará sajiin Suomas fuođđoguovddáš sáhttá mieđihit spiehkastatlobiid eanemustá 170 guovžža bivdui.

Lobiid leat mieđihan eandalii dakkár guovlluide, gos leat olu guovžžat ja daid meari ferte geahpedit. Nuortamus Suoma oasil leat váldán vuhtii maid guovžžaid váikkuhusa guovllu sarvvaid mearrái. Kainuus, Gaska-Suomas ja Bađaeatnamis spiehkastatlobiid leat mieđihan guovlluide, gos leat olu gottit.

Boazodoalloguvlui maid eanet lobit

Boazodoalloguovllus nuortaguvlui lea asáhuvvon 60 guovžža dihtomearri ja oarjeguvlui 25 guovžža dihtomearri.

Dat lea 15 guovžža eanet go diibmá. Dainna vigget geahpedit guovžža dagahan vahágiid boazodoalloguovllus. Mannan bivdobajis boazodoalloguovllus godde nuortaguovllus 54 ja oarjeguovllus 15 guovžža.

Luondduvárreguovddáža ođđasamos dutkamuša mielde Suomas leat dál eanet guovžžat go diibmá ja eandalii Nuorta-Suomas guovžžaid mearri lea lassánan. Dutkamušaid mielde Suoma vuvddiin ellet sullii 1700 guovžža. Mannan bivdobajis goddoje 179 guovžža.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä