Sápmi |

SSN, Greenpeace ja Suohpanterror álget ovttasbargui ja ordnejit sámenuoraide skuvlejumi luonddu suodjaleamis

Skuvlejupmi lea borgemánu loahpas Anáris.

Jietna: petra laiti 23.5.2018
Jietna
Suoma sámi nuorat -searvi, Suohpanterror ja Greenpeace ordnejit riikavulošskuvlejumi Anáris. Skuvlejumis oahpásmuvvet veahkaválddehisriikavulošdoaimma vuođđojurdagiidda ja vugiide, teoriija ja geavatlaš hárjehusaid bokte. SSN ságadoalli Petra Laiti muitala skuvlejumis eanet. Jietna: Yle Areena

Sámenuorain lea vejolaš fargga oahppat riikavulošdoaimmas. Suoma Sámi Nuorat, Greenpeace ja Suohpanterror ordnejit Anáris borgemánu loahpas riikavulošdoaibmaskuvlejumi.

Skuvlejumis oahpásmuvvet veahkaválddehis riikavulošdoaimma vuođđojurdagiidda ja vugiide, teoriija ja geavatlaš hárjehusaid bokte. Skuvlejumis maiddai ságastallet daid áššiid mearkkašumis sápmelaččaid vuoigatvuođaid bealušteamis, ovddideamis ja birasgáhttemis.

Jurdda lea skuvlet sámenuoraid das mot luonddu suodjalit veahkaválddehis vugiin

Suoma Sámi Nuorat –searvvi ságadoalli Petra Laiti lohká SSN:s, Suohpanterroris ja Greenpeaces leat oktasaš áddejupmi das, mot iežas guovlluid galggašii suodjalit.

– Dat skuvlejupmeprošeakta lea dakkár maid mii leat hui guhká plánen dan váras, ahte mot mii sáhttit buot buoremusat ovddidit daid min árvvuid. Jurdda lea duođaige skuvlet sámenuoraid ja sámeguovllu nuoraid dasa, ahte mot galgá luonddu suodjalit veahkaválddehis vugiiguin ja mot galgá hálddašit dan luondduguovllu gos ieš orru, ja mot dan sáhttá suodjalit boahttevaš konflivttain, Laiti muitala.

Laiti lohká, ahte sii sávvet, ahte skuvlejumi oasseváldit ožžot doaivaga das, ahte sis lea máhttu ja vejolašvuohta dorvvastit iežas boahttevuođa.

– Miihan buohkat diehtit, ahte ovdamearkka dihte dálkkádatrievdan boahtá váikkuhit sámi ealáhusaide, ja sámi guovlluide lea olu luonddu geavaheapmái sisabahkken. Skuvlejumi dárkkuhussan lea maiddái loktet dan kollektiivvalaš iešdovddu das, ahte mii sáhttit ja máhttit suddjet guovlluideame ja man nu láhkai dahkat ieža dan min boahttevuođa vejolažžan, Laiti lohká.

"Orru ahte Suomasge árktalaš guovllu oidnet dakkár myhtalaš ekonomalaš ovdáneami gáldun"

Jietna: Greenpeace arktis ja antárktis áššedovdi Laura Meller.
Jietna
Greenpeace arktis ja antarktis áššedovdi Laura Meller. Govva: Thomas Poole Jietna: Yle Areena

Greenpeace arktis ja antarktis áššedovdi Laura Meller muitala, ahte Greenpeace juohká SSN:a fuola das, ahte váikko dálkkádatrievdama fárta ja lundui čuohcci deattuid ipmirdit bures ságastallama dásis, nu almmolaš ságastallamis orru, ahte Suomasge árktalaš guovllu oidnet dakkár myhtalaš ekonomalaš ovdáneami gáldun, ja ahte dat buktá olu vejolašvuođaid earenomážit lossa luondduriggodatindustriijai. Sii oidnet, ahte dát lea dakkár ášši, mas leat ruossalasvuođat.

– Mii háliidit ovttas smiehttat ja gávdnat vugiid mot váikkuhit nu, ahte boahttevuođas árktalaš guovlu orošii leamen dakkár ráfi ja birassuodjaleami lávdi, gos juste váikko eamiálbmogiid rivttiid gudnejahttet ja dat áššit mat doppe dahkkojuvvojit, dahkko sin vuolggasajis, lohká Meller.

Vuosttažettiin skuvlejupmái váldet SSN-lahtuid

Petra Laiti muitala, ahte skuvlejupmi lea váldoáššis dárkkuhuvvon sámenuoraide, geat leat 13 – 29-jahkásaččat. Dát lea SSN:a lahtuid ahkerádji. Skuvlejupmái goit sáhttet ohcat earátge.

Skuvlejupmái ohcan olbmuid gaskkas sisabeassan vuoruhuvvo nu, ahte vuos besset SSN-lahtut, de sámenuorat geat eai leat SSN-lahtut ja de badjel 30-jahkásaččat ja sámeguovllu olggobealde orru olbmot.

Skuvlejupmi lea 31.8.-2.9.2018 Anáris.

Varrasamosat: Sápmi

Váldoođđasat

Varrasamosat

Muualla Yle.fi:ssä