Sápmi |

SSN ja Greenpeace ordnejit diehtojuohkindáhpáhusa Säätytalo olggobealde – vuostálastet Jiekŋameara ruovdemáđija

Gaskavahkkoiđida diehtojuohkindáhpáhusain háliidit geahččalit váikkuhit ráđđehusráđđádalliide.

petra laiti 23.5.2018
Suoma Sámi Nuoraid ságadoalli Petra Laiti. Govva: Ville-Riiko Fofonoff / Yle

Suoma Sámi Nuorat -searvi háliida váikkuhit ráđđehusráđđádallamiidda ja danin ordnege ovttas Greenpeacain Helssegis Säätytalo olggobealde gaskavahkkoiđit diibmu 8.00 rájes diehtojuohkindáhpáhusa, mas muitalit earret eará vuostehágus Jiekŋameara ruovdegeidnui. Suoma Sámi Nuoraid ságadoalli Petra Laiti mielas dat lea buorre vuohki juohkit dieđu ja geahččalit vel váikkuhit ráđđehusráđđádalliide.

– Mii áigut muittuhit sin das, ahte Jiekŋameara ruovdemáđija fidnun ja prošeaktan rihkošii sámiid vuoigatvuođaid ja livččii vearrái sámi ealáhusaide, muhto maiddái livččii boasttolágán mearrádus árktalaš dálkkádatrievdadeami eastima dihte.

Laiti muitala vuođđoulbmilin leat muittuhit ráđđehusráđđádalliide, ahte ruovdemáđija huksen gáibida politihkalaš mearrádusa ja ahte fápmu váikkuhit dan áššái lea ráđđehusráđđádalliin.

– Máŋgii go sámeguovllus dahket mearrádusaid, láve leat nu ahte politihkkariin ii álo leat aivve dievaslaš govva das, mo dat mearrádusat iešalddes váikkuhit sámiide ja lundui ja eamiálbmotrivttiide. Dárkkuhus lea juohkit dieđu dan prošeavtta birra sámiid ja luonddu geahččanguovllus, ja juohkit dieđu das, makkár mearrádusa sii leat iešalddes dahkamin.

Suoma ráđđehusráđđádallamat leamašan jođus jo buori áiggi ja joatkašuvvet Helssegis Säätytalos. Ráđđádallamiidda leat maiddái sámit háliidan beassat váikkuhit, go Sámediggi galledii mannan vahkus earret eará Antti Rinne ja riikabeaiovddasteaddjiid.

"Ii gávdno boahttevuohta, gos ruovdemáđija livččii duohtavuohta"

Suoma Sámi Nuoraid ságadoalli Petra Laiti háliida jáhkkit, ahte diehtojuohkindáhpáhusas lea váikkuhus. Ii dákkáriid livččii miella ordnet, jos ii jáhkášii dain leat váikkuhus, oaivvilda Laiti.

– Gal mun háliidan jáhkkit dasa, ahte politihkkariin seamma láhkái go eará olbmuinge, lea hállu dahkat buori. Dalle lea maiddái buorre veahkehit sin oaidnit dan olles gova vai sii sáhttet albmaláhkái dahkat daid mearrádusaid.

Laiti sávváge, ahte ráđđehusráđđádallit astet bisánastit ja guldalit SSN ja Greenpeace.

– Dieđán gal, ahte dán vahkus earenoamážit ráđđehusráđđádallamiin lea leamaš viehka hoahppu, muhto in jáhke geasge nu hoahppu, ahte ii gearggašii moatti minuhttii bisánastit ja váldit vuostá ovtta flaijeri. Gal mun jáhkán dat sámeáššit beroštahttet olbmuid, geahčakeahttá man bellodahkii gullo. Jáhkán, ahte olbmuin lea beroštupmi vaikko ii gearggašii olu áiggi dasa geavahit juste iđđedis.

Jiekŋameara ruovdemáđija loktanii fas ságastallanfáddán dán mánu álggus, go bođii ovdan ahte dovddus fitnodatalmmái Peter Vesterbacka áigu ovddidišgoahtit fidnu.

Petra Laiti oaivvilda ahte SSN lea gearggus dahkat buot ja visot dan ovdii, ahte Jiekŋameara ruovdemáđija ii ollašuvašii.

– Ii munnje goit gávdno dakkár boahttevuohta, gos dat ruovdemáđija livččii duohtavuohta, son loahpaha.

Varrasamosat: Sápmi

Váldoođđasat

Varrasamosat

Muualla Yle.fi:ssä