Sápmi |

SSN viggá joksat nuoraid – "Vai searvi ceavzá ja bissu aktiivan, mii fertet álgit ohcat skuvlaahkásaš lahtuid"

Suoma Sámi Nuorat -searvi áigu dán jagi bidjat politihkalaš návccaid válgajahkái ja ohcagoahtit skuvlaahkásaš lahtuid.

Suomen saamelaisnuoret: Ánte Veijola, Áile-Risten Holmberg, Juhán-Tuommá Magga, Ida-Maria Helander, Teija Kaartokallio, Máren-Elle Länsman, Enni Similä, Reetta Poikela, Petra Laiti, Karen-Anni Hetta, Anne Olli, Milla Pulska ja Ánne-Sofe Niittyvuopio
SSN jahkečoahkkima 2019 oasseváldit Ánte Veijola, Áile-Risten Holmberg, Juhán-Tuommá Magga, Ida-Maria Helander, Teija Kaartokallio, Máren-Elle Länsman, Enni Similä, Reetta Poikela, Petra Laiti, Karen-Anni Hetta, Anne Olli, Milla Pulska ja Ánne-Sofe Niittyvuopio. Govva: Suoma Sámi Nuorat / Suomen saamelaisnuoret

Suoma Sámi Nuorat -searvi (SSN) ii oro geasuheamen vuolleahkásaš nuoraid. Dan gávnnahedje vahkkoloahpas, go searvi doalai jahkečoahkkimis Oulus.

Jo goalmmát badjái ságadoallin válljejuvvon Petra Laiti muitala, ahte jahkečoahkkima buot oasseváldit ledje badjel 18-jahkásaččat. Searvi mearridiige bidjat dán jagi návccaid eará doaimmaid lassin skuvlaahkásaš nuoraid joksamii.

– SSN lea čielgasit dakkár sohkabuolvvaid rievdadansajis. Measta buot min lahtut leat badjel 18-jahkásaččat. Vai mii sihkkarastit, ahte searvi ceavzá ja bissu aktiivan, mii fertet álgit ohcat lahtuid, geat leat skuvlaahkásaččat ja smiehttat, makkár doaimmat geasuhit sin.

Petra Laiti oaivvilda, ahte jahki 2018 lei Sámis hui politihkalaš jahki, ja dat lea váikkuhan dasa, ahte doaibma lea geasuhan eanet boarrásut nuoraid. Laiti dadjá, ahte olu návccat leat biddjon politihkkii, ja danin searvi ii leat geargan nu olu ordnet eahpepolitihkalaš doaimmaid.

– Dan dáfus lea áibbas áddehahtti, ahte nuorat, geat leat eanet beroštuvvan politihkas, leat searvan diibmá fárrui. Lei sámediggeláhkaođastus, duohtavuođakomišuvdnaságastallan ja Jiekŋameara ruovdemáđija, ahte ledje dakkár losses fáttát.

"Davvi nuorain erenoamáš hástalus politihkas"

Petra Laiti oaidná searvedoaimma buorre vuohkin iskat, leago beroštuvvan politihkas vai ii.

– Muhto dat ii dárbbaš leat geaidnu politihkkemii, lasiha Laiti.

Son oaivvilda, ahte davviguovllu nuorain lea erenoamáš hástalus politihka ektui, daningo politihkalaš áššit leat davvin earálágánat go Mátta-Suomas. Davviguovllu rievttit ja davvi oainnut eai beasa oidnosii nationála dásis Suomas obanassiige, dadjá Laiti.

– Muhto jos lea vel sápmelaš ja nuorra davvin, dallehan fertešii leat diđolašvuohta sámi rivttiin ja eamiálbmotrivttiin. Viehka johtilit go álgit guorahallat sámi rivttiid, deaivat oaidnit hirbmat losses áššiid ja dat šaddá hirbmat persovnnalažžan.

Laiti jáhkká dan baldit nuoraid.

– Galhan sámenuorat, geat servet politihkkii, bajásšaddet hirbmat johtilit ja gártet viehka nuorran gieđahallat viehka issoras áššiid. Dat man nu láhkai dađi bahábut vehá gullá dasa eamiálbmotpolitihkkii, ahte ferte garrat dan politihka ektui.

Doaibmaplánas siskkáldas rievdadusat ja návccat válgajahkái

Nuorra lahtuid joksama ja ođđa stivrra válljema lassin vahkkoloahpa jahkečoahkkimis plánejedje, makkár doaimmat searvvis galget dán jagi. Ságadoalli Petra Laiti muitala, ahte dán jagi doaibmaplána sisttisdoallá viehka olu siskkáldas rievdadusaid.

– Mis leat moadde vuođđodoaimma, mat gáibidit ollislaš remontta. Mis lea neahttasiidoođastus ja mii leat molson dihto ovttasbargoorganisašuvnnaid.

Politihkalaš návccaidis searvi áigu bidjat Suoma riikkabeivviid ja Sámedikki válggaide, mat dollojuvvojit dán jagi.

– Mii viggat loktet sámetemáid riikabeaiválggain, ja go sámediggeválggat bohtet, mii háliidivččiimet ordnet válgapanela nuorra evttohasaide ja ávžžuhit nuoraid jienastit.

Petra Laiti lei mánnodaga 21.1.2019 guossin Buorre Iđit Sápmi -sáddagis áiggis 01:37:14 ja Ásllaga Á-studios áiggis 18:07.

Varrasamosat: Sápmi

Váldoođđasat

Varrasamosat

Muualla Yle.fi:ssä