Sápmi |

Stáhta bušeahttaárvalusas evttohuvvo Sámediggái 330 000 euro eanet ja Giellagáldui bissovaš ruhtadeapmi

Dál evttohuvvon lasáhus Sámediggái lea oaivvilduvvon earret eará sámeealáhusaid ja eará eanageavaheami oktiiheiveheapmái ja politihkalaš ja čanusjoavkodoaimmaid ovddideami várás.

Valtiovarainministeri Petteri Orpo esittelee vuoden 2019 budjettiehdotuksensa.
Ruhtadoalloministtar Petteri Orpo ovdanbuvttii ruhtadoalloministeriija bušeahttaárvalusa. Govva: Jarno Kuusinen / AOP

Suoma ruhtadoalloministtar Petteri Orpo lea otne duorastaga almmustahttán ruhtadoalloministeriija bušeahttaárvalusa stáhta bušeahttan jahkái 2019.

Sámediggái leat evttohan muhtun lasáhusaid ovdamearkka dihtii Giellagáldu doibmii ja sámedikki ollislaš mearreruhtii.

Riekteministeriija bušeahtas evttohuvvo 330 000 euro lasáhus sámediggái – ruhta várrejuvvon maid njulgenlávdegoddái

Sámedikki doaimmat gullet eanáš riekteministeriija doaimma vuollái. Riekteministeriija guoski evttohusas sámediggái evttohuvvo sullii 3,7 miljon euro jahkái 2019. Dat lea 330 000 euro eanet, go jahkái 2018 mieđihuvvon mearreruhta.

Riekteministeriija ekonomiijahoavda Tapio Laamanen lohká, ahte dat lea mearkkašahtti lasáhus Sámedikki ruhtadeami vuolggasaji ektui.

– Dan sáhttá lohkat, ahte dát lea oalle erenomáš mannan jagiid ektui, ahte Sámediggái evttohuvvo čielga lasáhus. Dát lea mearkkašahtti maiddái dan ektui, makkár lea Sámedikki ruhtadeami vuolggadássi. Dán jagi ruhtadeapmi leamaš 3,3 miljovnna ja dál das evttohuvvo 330 000 euro lasáhus, Laamanen dadjá.

Tapio Laamanen čilge, ahte Sámediggái evttohuvvo jagi 2019 mearreruhtii 460 000 euro lasseruhta (su. tasokorotus), go jagis 2018 lasseruhta lei dušše 130 000 euro. Dat mearkkaša dan, ahte 2019 Sámediggi livčče oažžumin 330 000 euro eanet go jagis 2018.

– Jahkái 2018 Sámedikki mearreruhtii lasihuvvui 130 000 euro. Diet lei dakkár ruhta, man juolludedje dušše dien ovtta háve. Dasto boahtte jahkái lea evttohuvvon 460 000 euro lasseruhtadeapmi, ja dat lea prinsihpas bissovaš lasahus, mas lea mearriduvvon giđđat, rámmamearrádusain, Laamanen muitala.

Dát lasseruhta lea čujuhuvvon earret eará sámeealáhusaid ja eará eanageavaheami oktiiheiveheapmái ja politihkalaš ja čanusjoavkodoaimmaid ovddideami várás.

Sámedikki lasseruhta 2019
Sámediggái evttohuvvo 460 000 euro lasseruhta jahkái 2019. Dasa lassin evttohuvvo 100 000 euro Giellagáldui. Govva: Screenshot riekteministeriija guoski bušeahttaárvalusas

Dasa lassin evttohusas várrejuvvo 100 000 euro njulgenlávdegotti várás, mii lea evttohuvvon dálá sámediggeláhkaárvalussii. Njulgenlávdegoddi gieđahalašii váidagiid, mat gusket sámedikki jienastuslohkui ohcaleami.

Miessemánus Interreg-prošeaktaruhtademiin nohkan Sámi Giellagáldui evttohuvvo 100 000 euro bissovaš ruhtadeapmi.

Yle Sápmi ii leat otne duorastaga fáhten Sámedikki ságadoalli Tiina Sanila-Aikio kommenteret sámediggái mieđihuvvon mearreruđaid.

Giellabeassedoibmii evttohuvvo 1,1 miljon euro

Oahpahus- ja kulturministeriija vuollái gullet ee. sámegielat ja sámegiela oahpahusa lágideapmi, oahppomateriála ruđat ja giellabeasseruđat.

Sámeguovllu giellabeassedoibmii evttohuvvo 850 000 euro ja giellabeassedoibmii sámeguovllu olggobealde evttohuvvo 250 000 euro.

Jahkái 2018 evttohuvvui álggus 700 000 euro sámeguovllu ja 200 000 euro sámeguovllu olggobeale giellabeassedoibmii, muhto maŋŋá ráđđehusbellodagat juolludedje vel liigeruđa giellabeassedoibmii. Nuba jahkái 2018 giellabeasseruđat ledje oktiibuot 1,2 miljon euro.

Jahkái 2019 evttohuvvo dál oktiibuot 1,1 miljon euro, nappo 100 000 euro uhcit go 2018.

Oahpahus- ja kulturministeriija spesiálaplánejeaddji Mikko Cortés Téllez lohká, ahte dát lea goittotge eanet, go mii evttohuvvui jahkái 2018 stáhtaráđi bušeahttaárvalusas.

– Dat lea das gitta, ahte man geahččanguovllus dan ášši geahččá. Leago dat riikkabeivviid mearridan bušeahta oainnus vai dan, mii lei ráđđehusa árvalus. Ráđđehusa diibmá evttohusa ektui, mii guoskkai dán jagi, de dasa lea lasihuvvon 150 000 euro, muhto riikkabeaivvithan dasto loahpalaččat mearridit das, ahte mii dat mearreruhta stáhta bušeahttaárvalusas boahtá leahkit, Cortés Téllez dadjá.

Oahppomateriála buvttadeami ruhtadeapmái eai boahtán rievdadusat, 500 000 euro mearreruhta evttohuvvo maiddái jahkái 2019.

Sosiála- ja dearvvašvuođaministeriija bušehttii evttohuvvo sámegielat sosiála- ja dearvvašvuođabálvalusaide seammá submi go dán jahkái, 480 000 euro.

Ráđđehusa bušeahttaráđđádallamat borgemánu loahpas

Ruhtadoalloministtar Orpo ii evttohan maidige stuorra hirpmástuhtti rievdadusaid boahtte jagi bušehttii olles Suoma ektui.

Olles Supmii guoski stuorra áššiin, nu mo eanadoalu ovddideapmái, bargguhisvuođa geahpedeapmái dahje ovdamearkka dihte Nuortameara suodjaleapmái Orpo ii evttohan maidige, muhto baicca sirddii daid áššiid ráđđehusa oktasaš bušeahttaráđđádallamiidda borgemánu lohppii.

Čuovvovažžan ruhtadoalloministtar Orpo ráđđádallá sierra buot ministeriijaiguin 15.–16. borgemánu. Ráđđehus gieđahallá bušeahttaárvalusa bušeahttaráđđádallamiin 28.–29. borgemánu.

Ráđđehusa evttohus almmustahtto stáhtaráđi gieđahallama maŋŋil 17. beaivve čakčamánu.

Ruhtadoalloministeriija gárve ráđđehusa ruhtadoalloárvalusa, ja dan maŋŋil dat ovdanbuktojuvvo stáhtaráđi almmolaš čoahkkimis. Bušeahttaárvalus addojuvvo riikkabeivviid gieđahallamii dalán riikkabeivviid čakčabaji álggus.

Stáhta bušeahttaárvalus dohkkehuvvo riikkabeivviid dievasčoahkkimis juovlamánus, go ruhtadoallováljagoddi lea addán iežas cealkámuša árvalusas.

Varrasamosat: Sápmi

Váldoođđasat

Varrasamosat

Muualla Yle.fi:ssä