Sápmi |

Stáhtaráđđi nammadan ráđđádallangotti Deanu guolástannjuolggadusa ođadeami várás – ráđđádallamat álget geasset

Ráđđádallangoddái gullet logi lahtu.

Tenojoki
Suoma ráđđádallangotti áirasat ovddastit eana- ja meahccedoalloministeriija, riekteministeriija, Lappi ealáhus-, johtalus- ja birasguovddáža, Deanu guolástanguovllu, Sámedikki ja guovllu turismafitnodagaid. Govva: Vesa Toppari / Yle

Suoma ja Norgga gaskasaš ráđđádallamat Deanu guolástannjuolggadusa ođadeamis álget geasset. Stáhtaráđđi lea dál nammadan ráđđádallamiidda Suoma ráđđádallangotti.

Ráđđádallangoddái gullet čuovvovaš lahtut:

Ságadoallin Vesa Ruusila, eana- ja meahccedoalloministeriija ovttadaga hoavda.

Vuosttaš várreságadoallin Tapio Hakaste, eana- ja meahccedoalloministeriija ráđđádalli virgeolmmoš.

Sanna Koljonen, eana- ja meahccedoalloministeriija spesiálaáššedovdi.

Mika Oraluoma, Lappi EBI-guovddáža guolledoallohoavda. Várrelahttu Maare Marttila, Lappi EBI-guovddáža guolástanbiologa.

Yrsa Nyman, riekteministeriija ráđđádalli virgeolmmoš. Várrelahttu Annika Naskila, olgoministeriija láhkaásahančálli.

Mika Aikio, Deanu guolledoalloguovlu. Várrelahttu Sisko Länsman, Deanu guolledoalloguovlu.

Riitta Orti-Berg, Deanu guolledoalloguovlu. Várrelahttu Sauli Sarre, Deanu guolledoalloguovlu.

Vesa Länsman, Deanu guolledoalloguovlu. Várrelahttu Keijo Pirttijärvi, Deanu guolledoalloguovlu

Anne Nuorgam, Sámediggi. Várrelahttu Asko Länsman, Sámediggi.

Ráđđádallangotti bissovaš áššedovdin nammaduvvo fitnodatdolliid ovddasteaddjin Petteri Valle.

Ráđđádallangotti nubbi várreságadoalli nammaduvvo ráđđádallangotti ortniiduvvama oktavuođas.

Ráđđádallamat johtui gáiddusčoahkkimiin

Guolástannjuolggadusas muitalit makkár njuolggadusaid vuođul Deanus oažžu bivdit. Dat sisttisdoallá earet eará iešguđet bivdinvuogi bivdináiggiid, lohpemeriid guovlluid mielde sihke dárkilut mearrádusaid, mat gusket bivdosiid.

Deanu guolástansoahpamušas lea mearriduvvon, ahte guolástannjuolggadusat leat mearreáiggi fámus. Vuosttaš guolástannjuolggadus lea fámus vihtta jagi guolástanbaji 2021 loahpa rádjái ja čuovvovaš njuolggadusat dan maŋŋá álo čieža jagi hávil.

– Guolástannjuolggadusa ođasmahttimiin figgat buoridit njuolggadusa nu ahte dat doaibmá buorebut ja lea čielgasut. Maiddái guolástanrivttiid geavaheapmi ja earet eará mánáid guolástanvejolašvuođat loktanit ovdan ráđđádallamiin, dadjá eana- ja meahccedoalloministeriija ráđđádalli virgeolmmoš Tapio Hakaste.

Guolástannjuolggadusráđđádallamiid lea dárkkuhus bidjat johtui vel ovdal geasseluomuid gáiddusčoahkkimiin ovttas Norggain, dasgo korona dagahan spiehkastatdili dihte eai vel sáhte ordnet dábálaš čoahkkimiid.

Stáhtaráđđi lea addán ráđđádallangotti ásaheami oktavuođas celkosa, mii deattuha luossanáliid ealáskeami dorvvasteami, sápmelaččaid rivttiid ovddideami sihke riikkabeivviid cealkimiid vuhtii váldima.

Varrasamosat: Sápmi

Váldoođđasat

Varrasamosat

Muualla Yle.fi:ssä