Sápmi |

Stáhtas 100 000 euro juovlaskeaŋka Sámediggái – kulturguovddážiid doaimmaide lasseresurssat

Ruhta lea oaivvilduvvon Sámedikki kulturguovddážiid bargiid bálkágoluide, dasgo resursavátni váttásmahttá daid doaimmaid.

Sámi álbmotbeaivi 2019. / Saamelaisten kansallispäivä 2019.
Riikkabeivviid ruhtadoallováljagotti smiehttamuš gárvánii duorastaga 12.12.2019. Govva: Vesa Toppari / Yle

Suoma riikkabeivviid ruhtadoallováljagoddi lea ožžon gárvvisin stáhta boahtte jagi bušeahta guoski smiehttamušas.

Smiehttamuš sisttisdoallá muhtun rievdadusaid, maid váljagoddi lea dahkan ráđđehusa bušeahttaárvalussii. Dát leatge nu gohčoduvvon juovlaskeaŋkaruđat, mat riikkabeivviid ruhtaváljagotti juhkosiin leat geavahusas boahtte jahkái sullii 40 miljovnna euro ovddas.

Sápmelaččat maid fidnejit oasáža dán supmis. Ruhtadoallováljagoddi lea mieđihan sámedáidaga ja -kultuvrra ovddideapmái 100 000 euro Sámedikki evttohusa vuođul.

Juovlaskeaŋkaruhta geavahuvvo kulturguovddážiid bargiid bálkágoluide

Suoma stáhta bušeahttaárvalusas lea várrejuvvon boahtte jahkái 178 000 euro Sámedikki kulturguovddážiid, nuppiid sániiguin Mánnu-mánáidkulturguovddáža, Skábma-filbmaguovddáža ja musihkkaguovddáža doaimmaide.

Dál árvaluvvon juovlaskeaŋkaruhta lea lasáhus daidda veahkkeruđaide. Juovlaskeaŋkaruhta lea oaivvilduvvon dasa, ahte kulturguovddážiid plánejeaddjit sáhttet bargat ollesáigásaččat.

Resursavátni lea dagahan hástalusaid kulturguovddážiid doaimmaid ollašuhttimii, dasgo bargit eai leat sáhttán bargat go oasseáigásaččat.

Sámediggi evttohii golggotmánus ruhtadoallováljagoddái, ahte riikkabeaivvit čujuhivčče Sámediggái boahtte jahkái juovlaskeaŋkaruđain oktiibuot 300 000 euro. Das 200 000 euro livčče oaivvilduvvon sámegielat sosiála- ja dearvvašvuođabálvalusaid sihkkarastimii sámi ruovttuguovllus, muhto dasa Sámediggi ii ožžon ruđa.

Varrasamosat: Sápmi

Váldoođđasat

Varrasamosat

Muualla Yle.fi:ssä