Sápmi |

Stáhtat eai leat gulahallan Jiekŋameara ruovdegeainnus Sámedikkiiguin – "Sámediggi ferte leat áibbas álggu rájes proseassas fárus"

Johtolat- ja diehtojuohkinministeriija lea bidjan johtui čielggadanbarggu Jiekŋameara ruovdegeainnu ollašuhttima ja gánnáhahttivuođa ovttas Norggain. Sámedikkit Suomas dahje Norggas eai leat leamaš ollenge mielde ságastallamin dán ášši olis, muitala Suoma sámedikki ságadoalli Tiina Sanila-Aikio.

Meahciráđđehuslága gullandilálašvuohta Roavvenjárggas 23.10.2015.
Govva: Vesa Toppari / Yle

Johtolat- ja diehtojuohkinministeriija lea bivdán Johtolatdoaimmahaga čielggadit ovttasbarggus Norgga johtolateiseváldiiguin vejolaš Jiekŋameara ruovdegeainnu ollašuhttima ja ekonomalaš gánnáhahttivuođa. Sámedikkit Suomas dahje Norggas eai leat leamaš ollenge mielde ságastallamin dán ášši olis.

Barggus galggašii čielggadit ruovdegeaidnofidnu vejolaš molsaeavttuid ja kártet geavaheaddjiid dárbbuid sihke vejolaš fitnodatdoaibmanmálle ja jearalmaspotentiála.

Sámedikki ságadoalli Tiina Sanila-Aikio mielde stáhtat eai leat leamaš makkárge oktavuođas Sámedikkiiguin dán ášši olis.

– Mun imaštalan sakka, ahte goabbáge riikkain ii leat gulahallan oktiige vel sámedikkiiguin. Dasa mii boahtit maiddái giddet fuomášumi sihke Norgga bealde ja Suoma bealde Sámedikkis ja go mii leat dál dáppe Singapores oktasaš bargomátkkis Ruoŧa, Suoma ja Norgga Sámedikkiiguin, de mii leat ságastallan dán ášši birra, muitala Sanila-Aikio.

Čielggadus sápmelaččaid čalmmiiguin

Sámedikkiid njunnožat leat dál mearridan loktet ášši Sámi parlamentaralaš ráđi stivrii ja dan bokte addit oktasaš oainnu ášši birra.

– Dieđusge vuosttažettiin mii fertet gáibidit dán áššis ekonomalaš, sosialalaš ja kultuvrralaš váikkuhusaid árvvoštallama.

Sanila-Aikio lohká maid, ahte lea dehálaš oažžut namalassii sámi ealáhusaid ja sámekultuvrra sápmelaččaid čalmmiiguin bargojuvvon čielggadusa.

"Vuosttaš lávki dieđusge muittuhit ministeriija"

Ovdal go Sanila-Aikio báhcá geasselupmui, áigu son muittuhit ministeriija das, ahte Sámedikkiin galggašii ráđđádallat sámediggelága mielde.

– Dál lea vuosttaš lávki dieđusge muittuhit ministeriija Suoma bealde ja gáibidit maiddái Sámediggelága ovccát paragráfa ráđđádallama ja dan mun áiggun bargat ovdal geasseluomuid.

Ságadoalli Sanila-Aikio muittuha maiddái, ahte ná stuorra proseassas Sámediggi berrešii leat álggu rájes mielde. Dál goit nu ii leat leamaš.

– Dat lea dan mađi stuorra proseassa, de Sámediggi ferte leat áibbas álggu rájes dakkár proseassas fárus ja beassat oassálastit dan ovddideapmái diená, ahte min oaidnu boahtá oidnosii ja dat váldet dan vuhtii.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä