Sápmi |

Stuđeretgo dahje leatgo juo filbmamediasuorggi ámmátlaš? Walt Disney Animation Studios ohcá sápmelaš hárjehalli

Sámiráđi kulturossodaga hoavda Christina Hætta sávvá, ahte hárjehallama geažil olles Sámi filbmabiras oažžu ođđa dieđuid ja dáidduid.

Christina Hætta
Sámiráđi kulturossodaga hoavda Christina Hætta illuda ovttasbarggus Walt Disney Animations Studiosiin. Govva: Sámiráđđi

Sámiid ja Disney ovttasbargu joatkašuvvá. Walt Disney Animation Studios ohcá dál sápmelaš hárjehálli dahjege oahpahalli geassái 2010.

Hárjehallis galgá leat sámi duogáš, ja son galgá leat stuđeremin dáidda-, gráfalaš-, animašuvdna-, dahje filbmasuorggi, dahje geargan dan suorggi oahpuin.

Hárjehalli sáhttá ohcat 10 000 dollára mátkestipeandda, man Sámiráđđi ja Suoma, Norgga ja Ruoŧa Sámedikkit ruhtadit.

Stipeandda eaktun lea, ahte hárjehallama maŋŋá hárjehalli galgá buktit ođđa dáidduidis ja dieđuidis ruovttoluotta Sápmái. Ohccis galgá leat plána, mo son áigu dan dahkat.

Sámiráđi kulturossodaga hoavda Christina Hætta mielde ulbmilin dainna lea addit sámenuoraide, geat barget mediasurggiin, vejolašvuođa ovddidit iežaset dan suorggis, gávdnat inspirašuvnna ja hukset riikkaidgaskasaš fierpmádagaid.

– Sámi filbmabiras lea hirbmat buori ovdáneamis, ja lea dehálaš doarjut Sámi nuorra filbmabargiid iežaset oahpus. Mii sávvat, ahte oahpahalli máhcaha man nu láhkai gelbbolašvuođa, man oažžu oahpahallin, ruovttoluotta Sámi servodahkii.

Ohcanáigi nohká ođđajagimánus

Hárjehallanprográmma bistá logi vahku. Dat juohkása čieža suorgái, dego buvttadeapmi ja animerenprográmmaid geavaheapmi.

Ohcamušaid galgá sáddet Walt Disney Animation Studios siidduid bokte maŋimustá 13.01.2020. Maiddái mátkestipeandda galgá ohcat Sámiráđis maŋimuštá 13.01.2020 iđđes.

Lassedieđuid gávdná Sámiráđi neahttasiidduin.

Fágalaš lonohallan ja gelbbolašvuođa ovddideapmi lea oassi Walt Disney Animation Studios, Sámedikkiid ja Sámiráđi gaskasaš soahpamušas. Soahpamuša dahke Jikŋon II -filmma ovttasbarggu oktavuođas.

Varrasamosat: Sápmi

Váldoođđasat

Varrasamosat

Muualla Yle.fi:ssä