Sámepolitihkka |

Sujala: Ruhtadeapmi sámedoaimmaide Meahciráđđehusa vuovdedoallofitnodagas

Sámediggi dohkkehii bearjadaga ohcejohkalaš áirasa Antti Sujala evttohusa oččodit stivrasaji Meahciráđđehusa ođđa vuovdedoallofitnodagas. Sujala mielas Sámediggái gulašii stivrasaji lassin maid oamastanoasus vuovdefitnodatdoaimmain.

Guoros jienat, tyhjät äänet 15.4.2016
Sámediggi dohkkehii Antti Sujala evttohusa oččodit stivrasaji vuovdedoallofitnodagas jienain 16–0. Govas jienastit áirasat geat guđđe guoros jiena. Govva: Pirita Näkkäläjärvi / Yle

Sámedikki áirras Antti Sujala mielas Sámediggi galggašii leat okta Meahciráđđehusa ođđa vuovdedoallofitnodaga oamasteaddjiin ja oažžut dan bokte ruhtadeami sámedoaimmaide.

– Oamastanoasus vuovdedoallofitnodagas livčče sáhttán oasil joba ruhtadit sámiid doaimma, jos livččiimet leamašan oamasteaddjit ja ožžon dan bokte boađuid, Sujala dadjá.

Antti Sujala (olg.) ja Magreta Sara
Govva: Vesa Toppari / Yle

Sámediggi oččoda stivrasaji vuovdedoallofitnodagas

Ohcejoga áirras Sujala evttohii bearjadaga lasihit Sámedikki doaibmaprográmmii, ahte Sámediggi oččoda stivrabáikki ja oamastanossosa ođđa vuovdedoallofitnodagas.

Ođđa vuovdedoallofitnodat doaibmá Meahciráđđehusa vuolde. Fitnodat dikšu stáhta vuovdečuohppamiid ovdamearkan sámeguovllus sihke vuovdá muoraid ovddosguvlui vuovdedollui.

ILO 169 -soahpamuša 15. artihkkala mielde eamiálbmogat galget beassat osolažžan das, go stáhtat ávkkástallet luondduriggodagaid eamiálbmotguovlluin.

"Min jietna gullošii buorebut"

Dievasčoahkkin dohkkehii bearjadaga Sujala evttohusa stivrasajis oččodeamis, muhto ii oamastangáibádusas.

Antti Sujala mielas Sámediggái gullá stivrabáiki dán dilis, mas stáhta lea ceggen ođđa vuovdedoallofitnodaga Meahciráđđehusa vuollái.

– Meahciráđđehuslágashan válde eret sámečuoggá ja galhan dán dilis stivrabáiki livčče leamašan symbolalaš dahku stáhtas midjiide, Sujala dadjá.

Sáhtášedjego sámiin leat duohtavuođas váikkuhanvejolašvuođat, go dathan livčče dušše okta báiki doppe stivrras?

– Gal mun jáhkán, ahte buorebut min jietna boađašii gullosii, go lea sáhka goittotge dákkár báikkis, mas beassá njuolga váikkuhit čuohte proseantta sápmelaččaid árbevirolaš ealáhusaid hárjeheapmái. Go buot maid Meahciráđđehus dahká, dashan lea njuolggováikkuhus min ealáhusaide, Sujala dadjá.

"Sámediggái gullošii stivrasadji maid olles Meahciráđđehusas"

Antti Sujala muitala, ahte iešalddes su mielas Sámediggái gulašii stivrabáiki maid olles Meahciráđđehusas, ii dušše Meahciráđđehusa ođđa vuovdedoallofitnodagas.

– Lei mu iežan fuollameahttunfeaila, ahte dan evttohusas bázii eret dat dehalamos, nappo ahte Meahciráđđehusas livččiimet ožžon maid stivrasaji. Dat lei mu iežan feaila dat.

Guoros jiena guođđán áirras smiehtada sámiid vejolaš rolla stivrras

Sámedikki dievasčoahkkin dohkkehii Sujala evttohusa vuovdedoallofitnodaga stivrasaji oččodeamis jienain 16–0.

Antti Sujala mielas jienastanboađus čájehii, ahte son lea rivttes bálgá mielde, go evttohii dákkára.

Neeta Jääskö
Neeta Jääskö Govva: Pirita Näkkäläjärvi / Yle
Njealjis guđđe guoros jiena: Pentti Pieski, Anu Avaskari, Kari Kyrö ja Neeta Jääskö.

Jääskö muitala, ahte son guđii guoros jiena Norgga beale vásáhusaid dihte.

– Dan álgen vihkkehallat, ahte šaddágo Sámediggi dahje sámiid ovddasteaddji vuovdefitnodaga stivrras oasálažžan sámi guovlluid billisteamis. Čujuhan Norgga beal vásáhusaide FeFo-hálddašeamis, Jääskö dadjá.

Varrasamosat: Sámepolitihkka

Váldoođđasat

Varrasamosat

Muualla Yle.fi:ssä