Sápmi |

Sullii duhát olbmo leat geahččan Jikŋon II -filmma Suoma Sámis

Eará guovlluin Suomas eai vel dieđe, man olu davvisámegielat Jikŋon II -filbma lea geassan gehččiid.

Jikŋon 2 - Frozen 2
Jikŋon II lea vuosttas Disney buvttadan filbma sámegillii. Govva: Disney

Davvisámegillii buvttaduvvon Jikŋon II -filbma lea geassan sullii duhát geahčči sámeguovllus. Filmma leat čájehan Anáris, Avvilis, Eanodagas ja Ohcejogas juovlamánu rájes. Filbma ii lean oaidninláhkai Soađegilis.

Eará guovlluid geahččilogut eai leat vel almmuhuvvon, muitala Walt Disney Company Nordic fievrridanhoavda Pekka Lehesmaa.

– Dat logut, mat mis dál leat, bohtet namalassii golmma davimus gielddas, gos filbma lea čájehuvvon. Eará filbmateáhterat, main Jikŋon II lea leamašan oaidninláhkai, eai leat vel almmuhan loguideaset, dadjá Lehesmaa.

Sámegielat Jikŋon II -filmma leat čájehan miehtá Suoma ja eará Davviriikkaid. Filbma lei oaidnimis juovlamánu loahpas Suoma stuorra gávpogiin goit Helssegis, Jyväskyläs, Kuopios, Lahtis, Oulus, Poris, Tamperes ja Turkus.

Walt Disney Company Nordic, nappo Disney Suoma ossodat, dieđihii, ahte suomagielat veršuvnna leat geahččan juo 300 000 geardde ovcci beaivvi siste.

Sii leat ilus das, ahte filbma lea bálvalan sámegielat gehččiid sin ruovttuguovllus.

– Mii eat vuordán ollenge makkár logut sámegielat filmmas bohtet, muhto leat nu giitevaččat ja ilus das, ahte filbma lea beroštahttán Sámi guovllus, illuda Lehesmaa.

Varrasamosat: Sápmi

Váldoođđasat

Varrasamosat

Muualla Yle.fi:ssä