Sápmi |

Sunna Siilasjoki lea okta dain, geaid eallin šattai álkibun vuodjinkoartaođastusa maŋŋá – dál sullasaš sierralobiid mieđiheame guorahallet ođđasit

Diibmá 33 proseantta Lappi guovllu 17-jahkásaččain oaččui biilavuodjinkoartta sierralobiin. Dál moadde jagi boares láhkaođastussii áigot dahkat nuppástusaid.

Sunna Siilasjoki
Gárasavvonlaš Sunna Siilasjoki eallin šattai olu álkibun, go son fidnii sierralobiin vuodjinkoartta juo 17-jahkásažžan. Govva: Sunna Siilasjoki

Sierralobiin son oaččui juo beannot jagi dassá vuodjinkoartta. Bargui beassá okto ja dat lea buorre. Jietna: Linda Tammela / Yle

Vuodjinkoartaođastus bođii fápmui suoidnemánus 2018, muhto dál dan áigot juo ođasmahttit. Ođastusas okta mearkkašahtti lávki lei dat, ahte dan mielde nuorat sáhttet oažžut biilavuodjinkoartta jagi ovdal go deavdán 18 jagi sierra lobiin, jus fal dasa leat buorit ákkat.

Dál lea áigumuš goittotge ođasmahttit easkka moadde jagi boares lága. Liikenneturva (sám. Johtolatdorvvolašvuohta) oaidná, ahte ođasmahttimii lea dárbu. Sivvan lea dat, ahte vaikko nuorain obalohkái Suomas lihkuhisvuođat leat geahppánan, 17-jahkásaččat leat lápmašuvvan biilla vuoddjin eanet go ovdal.

Liikenneturvas leat iežas evttohusat, mo dál galggašii ođasmahttit koartta eavttuid. Okta vejolašvuohta livčče dat, ahte nuorra oaččošii vuodjit biilla dihto, ráddjejuvvon eavttuiguin, muitala Liikenneturva beaivválaš jođiheaddji Pasi Anteroinen.

– Dát sáhtášii dárkkuhit ovdamearkka dan, ahte go nuorra oažžu koartta, sus livčče vuosttaš mánotbajiin álo rávesolmmoš vuojedettiin fárus. Maiddái vuodjima ihku sáhtášii ráddjet, muitala Anteroinen.

Okta evttohus lea dat, ahte nuoras eai oaččoše leat fárus nu máŋggat vuollel 18-jahkásaččat, eaige eisege ihku.

Sunna Siilasjoki ii livčče beassan boazobargguide koartta haga

Lappi eanangottis 17-jahkásaččaid biilavuodjinkoarta lea geasuhan sakka. Jagis 2019, go ođastus lei vuosttaš jagi albmaláhkái fámus, Lappi eanangottis 25 proseantta 17-jahkásaš nuorain lei ožžon sierralobi. Čuovvovaš jagi, 2020, juo 33 proseanttas dan ahkeluohkás lei biilavuodjinkoarta.

Gárasavvonlaš Sunna Siilasjoki lea okta dain, guhte oaččui sierralobiin vuodjinkoartta, go devddii 17 jagi golggotmánus 2019. Iežas koartta haga son ii livčče sáhttán johtit okto gosage.

Siilasjokii vuodjinkoarta lea leamaš earenoamáš dehálaš: ovdamearkka dihte mátki boazobargguide ii lihkostuvaše eará láhkái, go ieš vuodjimiin. Mátki ealu lusa lea 30 kilomehtera, muhto muhtimin Siilasjokis leamaš čuohtege kilomehtera bargomátki. Sutnje dehálamos ágga sierralobi fidnemii leige namalassii bargui johtin.

Guhkes gaskkaid Giehtaruohttasis orodettiin leat earátge sivat, manin vuodjinkoarttas lea ávki.

– Mu buot olbmát orrot Heahtás ja dohko lea 60 kilomehtera, nu livččiihan dat somá beassat dohkoge, ahte ii dárbbat okto leat Gárasavvonis, son muitala.

Siilasjoki dadjá, ahte ii leat goit iežas eallinbirrasis oaidnán sivaid dasa, manin koartta ii sáhtáše juo 17-jahkásažžan oažžut.

Biilalihttu ii liiko ođđa evttohusaide: váttásmahttá vásttolaš nuoraid eallima

Biilalihttu (suom. Autoliitto) beaivválaš jođiheaddji Pasi Nieminen ii leat duđavaš evttohusaide vuodjinkoartaođastusas. Son muitala Ylen aamu -prográmmas, ahte vuodjinkoartalága leat máŋgii ođasmahttán maŋimuš logi jagi áigge. Danin livčče buorre vuordit vehá guhkkit áigge, mo ođđa láhka doaibmá, ovdalgo dan vuot álgá rievdadit.

– Sávašin, ahte sáhtášii guhkkit áigodagas oaidnit mearrádusa váikkuhusaid, Nieminen oaivvilda.

Nieminena mielas stuorámus váttisvuohta ođastusa evttohusain lea das, ahte dat váttásmahttá johtima maiddái dain nuorain, geat vuddjet doppe vásttolaččat ja njuolggadusaid vuođul.

Sunna Siilasjokii vuodjinkoarta lea addán olu. Dat lea álkidahttán sakka su ja olles su bearraša eallima.

– Mun in livčče beassan gosage okto. Dalle go ožžon koartta, sáhtten okto mannat bohccuid lusa. Dat veahkehii hui olu min bearraša, muitala Siilasjoki.

Varrasamosat: Sápmi

Váldoođđasat

Varrasamosat

Muualla Yle.fi:ssä