Sápmi |

Suohpanterrora govat oaidninláhkái Tamperes

Pispala dálá dáidaga guovddážis leat Suohpanterrora govat mat ovttastit máinnusgovaid ja gáhtadáidaga. Govain kritiseret earet eará ruvkeindustriija ja vuoddjit sápmelaččaide eamiálbmoga sajádaga.

suohpanterror hirvitalo
Suohpanterrora lahttu čiehkan ámadajustis liinni ja beaivvášlásaid duohkái. Govva: Yle Uutiset

Sápmelaš dáiddárjoavku Suohpanterror geahččala nuppástuhttit máilmmi dáidaga vugiin. Suohpanterror dahká plakáhtaid, main kritiserejit ruvkeindustriija ja vuoddjit sápmelaččaide eamiálbmoga sajádaga. Plakáhtat ovttastit máinnusgovaid ja gáhtadáidaga. Tampere Pispalas, kulturguovddáš Hirvitalo lea dievva Suohpanterrora propagandaplakáhtaid.

– Dát lea turistamáinnus. Teavsttaid hámis hupmat turismmas, muhto govaiguin čujuhit áššiid duođalut dili, muitala Pispala dálá dáidaga guovddáža čájáhusa ráhkadeaddji Jonne Kauko, ja čujuha ovtta plakáhta.

Kauko muitala, ahte sierralágán govvamateriála geavaheapmi ja doahpagiiguin speallan geasuhit.

– Geasuha dát doahpagiiguin speallan, ahte juoidá dadjat njuolga, juoidá eufemismmaiguin, juoidá bidjat jearaldatvuložin sáddemiin álgoálgosaš sága, muhto sajuštemiin dan ođđa oktavuhtii. Dasto dieđusge maiddái sierralágán govvamateriála geavaheapmi sierra gálduin, muitala Kauko.

Kritiseret ruvkeindustriija ja vuoddjit sápmelaččaide eamiálbmoga sajádaga

Plakáhtaid duohken lea sápmelaš dáiddár-aktivisttaid joavku Suohpanterror. Gaskaoapmin leat plakáhtat, mat levvet earenoamážit sosiála medias. Áŋgiris árvvoštallama čuozáhahkan lea earet eará ruvkeindustriija, mii Suohpanterrora mielde duššada luonddu ja dan mielde sápmelaččaid eallinbirrasa. Oasis oačču maiddái Suoma stáhta, mii ii leat ratifiseren sápmelaččaid eamiálbmot-stáhtusa.

– Stáhta ii leat mieđihan sápmelaččaide eamiálbmotvuoigatvuođaid. Stáhta ii leat soabahan daid daguid, maid lea dahkan ovddit sohkabuolvvaide. Ja stáhta joatká ain suomaiduhttinpolitihka, dadjá iežas ámadajustis čiehkan Suohpanterrora lahttu.

Eamiálbmot-stáhtusii laktása maiddái gažaldat eanaoamastanvuoigatvuođas, mii lea fuonidan sápmelaččaid ja suopmelaččaid gaskavuođaid Lappis. Oasil dán sivas Suohpanterror doaibmá anonyman.

– Dat gullo dan genrei, mas doaibmat. Das ii leat mearkkašumi geat dan dáidaga dahket, muhto dain min bargguin. Lassin sámepolitihkkárat vásihit veahkaválddi áitaga, sin leat ovdamearkka dihte uhkidan goddit. Ná oassi dáiddáriin háliida suodjalit iežas ja iežas bearraša, muitala anonyma Suohpanterrora lahttu.

Varrasamosat: Sápmi

Váldoođđasat

Varrasamosat

Muualla Yle.fi:ssä