Sápmi

Suoma áidna metro ii leatge Helssegis – Heahtás vuodjá metro, mii doaibmá jeagilfámuin

Heargemetro vuodjá Heahtás geahppajohtolaga luotta alde.
Heahtá heargemetro vuodjá gili geažis geahčái ja dasa sáhttá njuiket fárrui gos beare ja báhcit eret gos beare, gos leat miellagiddevaš oaidnámušat dahje bálvalusat. Govva: Vesa Toppari / Yle

Buohkat jáhkket, ahte Suoma áidna metro gávdno Helssegis, muhto ná ii eisige leat. Heahtá márkana iežas metro vuodjá gili geažis geahčái ja bisána miellagiddevaš báikkiin dahje bálvalusaid bokte.

Heahtás lágiduvvui ikte duorastaga boazo- dahjege heargemetro, mii geasuhii olbmuid. Heargemetroi sáhttá njuiket fárrui bisánanbáikkiin, mat leat miehtá gili ja báhcit eret doppe, gos háliida.

Ja leaba metros áigetávvalge, maid goit geahččalit čuovvut, muhto herggiid eavttuiguin dieđusge doibmejuvvo.

Bisánanbáikkit leat válljejuvvon dan mielde, leatgo das láhkosis miellagiddevaš oaidnámušat, fitnodagat dahje bálvalusat.

Boahtte duorastaga 4.3. metro vuodjá fas.

Video: Heargemetro vuodjá Heahtás geahppajohtolaga luotta alde.
Hávil fárrui váldit guhtta ollesolbmo ja 1–2 máná. Video: Yle Areena

Neahkkila gili hearggit gálle obbasa čađa Heahttái

Boazodoalli Miika Vanhapiha Eanodaga Neahkkelis ja su oabbá Marjo Magga leaba fuolahišgoahtán Eanodaga ođđa sáhtto- ja guoimmuhanfáladagas, heargemetros. Jurdda goit heargemetros bođii konsultafitnodaga bokte, muhto soai vulggiiga duohtandahkat dán somás hommá.

Heargemetro vujii Heahtás vuosttas geardde juovlabasiid áigge ja dál fas dálveluomuid áigge dat lea doaimmas. Mielde leat gielda ja máŋga verddefitnodaga.

Dán doaimma várás lea fitnašuvvan nu daddjon koronadoarjja fitnodagaide.

Marjo Magga veahkeha heargemetros.
Marjo Magga lea veahkkin buot bargguin mat gullet heargemetroi. Govva: Vesa Toppari / Yle

Boazodoalli Miika Vanhapiha vujii juo gaskavahku Neahkkila gilis Heahttái. Mátki lea sullii golbma miilla..

Son muitala, ahte luodda leai gal báikkuid jovgon, ja mátkái golai áiggi olles gávcci diimmu. Muhto nu sii goit jovde Heahtái ja besse ikte heargemetro bidjat johtui.

Boazodoalli Miika Vanhapiha mielde herggiin leat dihtolágan gáibádusat vai dat dohkkejit metroheargin. Galget leat goit hárjánan olbmuide, ahte eai bala vaikke mánnáčora jorašii birra.

– Gal dat lea váhá earálágán vuoddjit geahppajohtolaga luotta mielde go meahcis. Muhto bures hearggit doibme, ja go beare jeagil lea njuni vuolde, de gal dat bures manná, muitala Miika Vanhapiha.

Leahan jearaldagas mohtor, mii doaibmá jeagelfámuin, iige elrávnjjiin dego albma metro Helssegis. Danin ferte jurddašit maid herggiid ceavzima.

Boazodoalli Miika Vanhatalo Neahkkilis Eanodaga gielddas ja su metrohearggit.
Boazodoalli Miika Vanhapiha Neahkkilis muitala, ahte jeagelfámuin doaibmi metro lea geasuhan olbmuid. Govva: Vesa Toppari / Yle

Olbmot liikojit ealli metros

Vaikko turisttat leatge dál unnán jođus, de lea dán suohtas fearánii jearalmas. Bohccuidhan olbmot goit háliidit oaidnit ja čohkkánit fárruige, dat lea okta sámeguovllu turismma geađgejulggiin.

Metro leamašan dievva measta olles áiggi. Hávil fárrui váldit guhtta ollesolbmo ja 1–2 máná, bohccuid dihte deattu ferte goit ráddjet. Dát sáhttu geavaha unnán boaldámuša ja lea jaskat. Dat ii maid nuoskkit birrasa, čaimmiha Miika Vanhapiha.

– Muhto manná sihkkaris vugiin ovddosguvlui, vaikke iihan fártta leat gal nu issoras garas, son vel lasiha.

Helssetlaš Vilma Isokoski ja Neea Rapanen mielas jeagilmohtormetro lei somás vásáhus ja soai leigga vuosttas gearddi reagas.

Turkulaš Karri ja Sampo Mikkonen áigguiba seamma beaivvi áigge vel beatnagiiguinge vuoddjit.
Turkulaš Karri ja Sampo Mikkonen áigguiga seamma beaivvi áigge vel beatnagiiguinge vuoddjit. Govva: Vesa Toppari / Yle

Turkulaš Karri ja Sampo Mikkonen leigga fas mátkkis Duottar-Sámi luondduguovddážii Heahtá gili nuortageahččái.

Soai eaba duđa dušše heargesáhtui, muhto áiguba maid beatnagiiguin vel vuoddjit seamma beaivvi áigge. Soai deattuheaba, ahte gal boazometro lei beaivvi somámus vásáhus.

Varrasamosat

Muualla Yle.fi:ssä