Sápmi |

Suoma Álbmotmusea bidjá eamiálbmogiid Mesa Verde -hávdečoakkáldaga vel oktii oaidninláhkai ovdal go dat máhcahuvvo Amerihkkái

Čoakkáldaga 27 dávvira leat oaidninláhkai Álbmotmuseas 14.1.–1.3.2020.

Mesa Verde -čoakkáldaga guksi.
Dát guksi lea gávdnon ovtta hávddis Rock Canyon Kodak House bázahusain. Govva: Matti Huuhka / Musealágádus

Amerihká eamiálbmogiid Mesa Verde -hávdečoakkáldat boahtá oaidninláhkai Suoma álbmotmuseai Helssegii ovdalgo musea máhcaha čoakkáldaga eamiálbmogiidda Amerihkkái.

Čoakkáldahkii gullet anasazi-álbmoga hávddiin roggojuvvon dávttit ja hávddiin leamašan dávvirat. Hávddiid árvalit leat 1200-logus. Čoakkáldagas leat ruhkut, kummat, roggansoabbi, ákšodearri ja maid máissa gordneoaivi.

Hávdečoakkáldaga 27 dávvira leat oaidninláhkai Álbmotmuseas 14.1.–1.3.2020. Etihkalaš sivaid geažil dávttiid ii goittotge beasa oaidnit. Hávddiid dávvirat soitet dál leat maŋimuš háve oaidninláhkai almmolaččat.

Čoakkáldat gárttai Álbmotmuseai testameantta bokte

Mesa Verde -várri lea USA Colorados. Guovllu ássansajit guorranedje sullii 1300-logus. Anasazi-álbmoga árvalit vánddardan máttás Ođđa-Meksiko ja Davvi-Arizona guovlluide. Anasazit leat dálá pueblo-álbmoga máddarat.

Ávdin báhcán Mesa Verdes ledje roggan ja rievidan hávddiid jo guhká ovdal go ruoŧŧelaš geologa ja šaddodiehtti Gustaf Erik Adolf Nordenskiöld (1868–1895) ollii guvlui jagis 1891. Álbmotmusea čoakkáldaga dávvirat ja dávttit leat gávdnon Nordenskiöld ollašuhttin roggamiin ja dat lea stuorámus Masa Verde -čoakkáldat USA olggobealde.

Cliff Palace kuuluu pueblo-intiaanien rakentamiin kallioasumuksiin Mesa Verdessä, Coloradossa.
Cliff Palace gullá hopi-álbmoga bákteássansajiide Mesa Verdes, Colorados. Govva: Gustaf E. A. Nordenskiöld / Museoviraston Kuvakokoelmat

Álbmotmusea oaččui Nordenskiöld roggan čoakkáldaga suopmelaš dáiddaberošteaddji Herman Frithiof Antell testameantaskeŋkema bokte.

Mesa Verde -čoakkáldahkii gullet oktiibuot sullii 600 dávvira, main earát go hávdebázahusat ja -dávvirat báhcet ain Álbmotmusea háldui. Dávviriid árvalit leat 500–1300-loguin.

"Vuolggasadjin lea, ahte dávttit hávdáduvvošedje"

Čoakkáldaga máhcaheapmi dahjege repatriašuvdna loktanii ovdan golggotmánus 2019 Suoma presideantta Sauli Niinistö ja USA presideantta Donald Trump deaivvadeamis. Repatriašuvdnaproseassa ovdána ovttasbarggus USA ambassadevrrain.

Ulbmilin lea máhcahit čoakkáldaga jagi 2020 áigge.

– Suoma álbmotmusea čielggada čuovvovažžan, man oassebeallái Mesa Verde -čoakkáldaga dávviriid ja dávttiid galgat luobahit ja mii daidda dan maŋŋá dáhpáhuvvá. Vuolggasadjin lea, ahte dávttit hávdáduvvošedje, muitala čoakkáldatintendeanta Heli Landentausta Suoma álbmotmuseas.

Varrasamosat: Sápmi

Váldoođđasat

Varrasamosat

Muualla Yle.fi:ssä