Sápmi |

Suoma bealde davimus Sámi jogaid vurdet dulvat dál vahkuloahpas

Muohta suddá dál hui johtilit davvin ja dat dagaha garrasut dulvviid go gaskamearálaččat olles Lappi guovllus.

Avviljohka, Ivalojoki
Avviljogas jieŋat ledje juo mannan 11.5.2018. Govva: Vesa Toppari / Yle

Ovdamearkan Avviljogas dulvvi vurdet leat alimus muttus dáid beivviid ja boahtte vahku álggus.

Avvillaš Heikki Kiviniemi finai bearjadaga Avviljoga gáttis Avvila gilis imaštallamin dulvedili. Son jáhkká, ahte vahkkoloahpas sáhttá váhá vel dulvat. 

Avviljogas dulvvi vurdet leat alimus muttus dáid beivviid ja boahtte vahku álggus.
 

– Dulvá dat vehá, muhto in jáhke, ahte ollu go dás vulos dat assát jieŋat leat juo mannan. In jáhke, ahte duohko vulobeallái šat šaddet jiekŋabuođut go dás jieŋat moallanit ja suddet ovdalgo jávrái jovdet, árvala Kiviniemi.

Heikki Kiviniemi, Avvil
Avvillaš Heikki Kiviniemi ii jáhke, ahte Avviljohka dulvá šat nu ollu. Govva: Vesa Toppari / Yle

Maiddái Deanus lassána čáhci lagaš beivviid áigge. Eiseválddiid árvvoštallama mielde alimus dulvi Deanus lea 15. -16.5. Deanu dulvi lea veháš allelis go dábálaš.

Máddelis Lappis vearrámus dulvvit

Lappi ealáhus-, biras- ja johtolatguovddáža mielde vearrámus dulvedilli šaddá Duortnus eanus Durdnosa gávpoga buohta boahtte vahkus beallemuttus. Maiddái Ovnnesjogas giđđadulvi lea garrasut go gaskamearálaččat. Duortnus ja Ovnnesjogain alimus dulvi lea boahtte vahku gaskkamuttus.

Lappi gádjunlágádus čuovvu dulvedili ovttas eará eiseválddiiguin ja almmuha dili birra interneahtas Dulveguovddáža siidduin http://www.tulvakeskus.fi.

Varrasamosat: Sápmi

Váldoođđasat

Varrasamosat