Sápmi |

Suoma beale nissonráppár Catty E Márkomeannui – "Rapmusihkka lea dat mu ráhkisvuohta"

Jos buot manná plánaid mielde, de Elle-Máret Valle almmustahttá iežas vuosttaš skearru čuovvovaš jagi siste.

Catty E, Elle-Máret Valle
Elle-Máret Valle dahjege Catty E lea okta dán jagáš Márkomeannu-festivála artisttain. Govva: Márkomeannu

Ráppár Catty E, dahjege Elle-Máret Valle lea okta dán jagáš Márkomeannu-festivála artisttain. Márkomeannu lágiduvvo Gállogiettis Evenášši suohkanis, Norgga beale Sámis 23.-26.7.

Valle muitala, ahte vuordimis lea buorre, fámolaš ja gelddolaš konsearta. Sus leat muđuige buorit vuordámušat Márkomeannui vuolgimis.

– Dat dat gal lea hui speanta, in leat goassige ovdal doppe oba fitnange, ahte iluin vuorddán gal dan, muitala Valle.

– Oassi bihtáin lea eaŋgalsgillii, muhto gal eanet sámegielat bihtát leat boahtime doppe, muitala Valle iežas konseartta birra.

Dassážii Márkomeannu lea almmustahttán njeallje artistta. Ondt Blod ja Marja Mortenson čuojahit bearjadaga 24.7. ja KeiiNo ja Catty E čuojahit lávvardaga 25.7.

"Ii lean dárkkuhus mannat lávddi ala"

Márkomeannu ii leat vuosttaš festivála, gos Elle-Máret Valle lea ráppemin. Jagis 2018 Valle njuikii lávddi alde Riddu Riđđu -festiválas. Dan ovdal sus lei guhkit boddu rapmusihkka bargamis.

– Munhan gal álggahin dan ráppema jo 2000-logu álggus, muhto dasto dat vehá bázii. Dat Riddu Riđđu lei dakkáraš, gos dat oppa hommá vehá nugo álggii ođđasit.

– Mus ii lean dárkkuhus oba mannatge lávddi ala, muhto áššit dušše dáhpáhuvve. Barggaime ovtta šuoŋa ja dasto fuomášin, ahte leange jo doppe lávddi alde, bohkosa Valle.

Son lei gal ovdal Riddu Riđđu -festiválage jurddašan, ahte álggášii ođđasit bargat rapmusihkain.

– Gal mun ledjen jo ovdalge dan jurddašan. Moadde jagi dassái munnje bođii dakkáraš, ahte galggan ođđasit álgit dan ráppema dahkat. Dat rapmusihkka lea goittotge dat mu ráhkisvuohta, ja dat lea munnje hui dehálaš. Jurddašin, ahte jos in dan daga, de dat lea hui suddu.

Circumpolar Hip Hop Collab Riddu Riđus 2018
Elle-Máret Valle njuikii lávddi ala Riddu Riđđu -festiválas jagis 2018 ovttas Circumpolar Hip Hop Collab -joavkkuin. Govva: Aslak Paltto / Yle

Sámegielainge sáhttá bures ráppet

Ohcejoga Gámasmohkis bajásšaddan Elle-Máret Valle álggii badjedásis guldalit rapmusihkka, ja máŋggaid jagiid son beare guldalii dan, ovdal go álggii ieš bargat dainna.

– Álgen vehá nugo leaikkain vuostten ráppet, muhto máŋgasat mu skihpárat lohke, ahte donhan ráppet hui bures, ahte bargga fal eanet dan. De mun álgen dan bargat measta juohke beaivve, muitala Valle mo sus buollái ráhkisvuohta rapmusihka bargamii.

Dalle go Valle álggahii, son ráppii dušše suoma- ja eaŋgalsgillii. Moadde jagi dassái son movttáskii bargat maiddái sámegillii.

– Ledjen jurddašan ovdal, ahte dat lea menddo váigat, ahte eai gávdno dakkáraš sánit mat heivejit oktii. Muhto dasto go geahččalin, de fuomášin, ahte sámegielainhan sáhttá hui bures maid ráppet.

Valle muitala, ahte son oažžu iežas bihtáide inspirašuvnna hui iešguđetlágan áššiin.

– Sáhttá leat vaikko mii nu girji, man lean lohkan, dahje maid nu maid oainnán iežan árgaeallimis. Dahje mii nu ášši, mii lea dáhpáhuvvan mu skihpárii. Dat leat hui earálágán áššit, main dat inspirašuvdna vuolgá.

– Fáttátge leat hui earálágánat, mun sáhtán ráppet ráhkisvuođa birra, dakkár vásáhusaid birra mat leat eallimis leamašan ja dasto maiddái dán dálá máilmmi dilis.

Elle-Máret Valle
Elle-Máret Valle Riddu Riđđu -festiválas jagis 2018. Govva: Aslak Paltto / Yle

Ođđa musihkka barggu vuolde

Valle siŋgel Eyes of a fighter almmustuvai jagi 2018 loahpageahčen. Ođđa bihtát eai leat vel almmustuvvan, muhto dat leat gal barggu vuolde.

– Mus lei iešalddes dárkkuhus dán mánus vuolgit báddet ja dasto maiddái almmustahttit. Dat goittotge vehá fanai, go mu buvttadeaddji ii leat dál Suomas. Mus livččii mearri boahtte mánu loahppageažis báddet bihtáid ja dasto maiddái hui johtilit báddema maŋŋá almmustahttit ođđa musihka. Mus leat várra čieža dahje gávcci bihtá maid lean čállán, muhto ferte fal báddet daid.

Valle muitalii moadde jagi dassái, ahte son lea plánemen iežas skearru. Vel son ii goittotge máhte dadjat dárkilis áiggi skearru almmustuvvamii.

– Mus leat nu máŋga bihtá jo gárvvisin, ahte go daid lea bádden, de das varra váilot dušše okta dahje guokte bihtá, maid ferte vel bargat.

– Jos dál buot manná plánaid mielde, de varra čuovvovaš jagi siste, muitala Valle skearru almmustuvvamis.

Muhto mas boahtá su artistanamma Catty E?

– Dat E boahtá das, go mun lean Elle-Máret, dat álgobustáva. Dat Catty lea nugo bussálágan, dakkáraš vehá ilgatge. Dat Cattyhan lea vehá dego mu alter ego. Catty E sáhttá dadjat áššiid vehá eanet fasttit, go dat Elle-Máret árgaeallimis, bohkosa Valle.

Guldal Elle-Máret Valle jearahallama Sohkaršohkas duorastaga 12.3. diibmu 17.30–20.00.

Varrasamosat: Sápmi

Váldoođđasat

Varrasamosat

Muualla Yle.fi:ssä