Sápmi

Suoma ja Norgga oktasaš girjebusse beasai viimmat fas Suoma beallái guhkes bottu maŋŋá

kirjastoauto
Ohcejoga gielda álggahii ovttasbarggu Deanu ja Unjárgga girjerádjobiillain ođđajagimánus 2020. Govva: Kirsti Länsman / Yle

Ovddit háve girjebusse lea galledan Suoma bealde ođđajagimánus koronaráddjehusaid geažil. Máŋgasat leat vuordán beassat fas girjebussii.

Ohcejoga, Deanu ja Unjárgga gielddaid oktasaš girjebusse vuojesta Ohcejoga dearvvašvuođaguovddáža ja ássanbálvalusa šilljui. Ovddit háve dat lea galledan Suoma bealde ođđajagimánus koronaráddjehusaid geažil.

Norga ložžii mátkkoštanráddjehusaid vuossárgga nu, ahte Norgga riikavuložat ja Norggas ássi olbmot besset rasttildit rájá karantena haga.

Viljo Hánsa Vuolab lea vuordán girjebusse galledeami. Son illudage dál go beassá fas dutkat mii girjebusses lea fállun iige dárbbaš vázzilit girjerádjui skuvlaguovddážii.

– Na dat lea buorre, ii dárbbaš dohko vuolgit vázzit, beassá dás válljet ráfis oktonassii. Gal mun dás eanemus ávkašuvan, ahte somá lei go gárten, muitala Vuolab.

Viljo Hans Vuolab
Viljo Hánsa Vuolab lea beroštuvvan dolgevuokkaid čatnamis ja lea ohcamin girjjiid ja bláđiid dan birra girjebusses. Govva: Kirsti Länsman / Yle

Girjerádjobargi: Girjebusse fállá ovttaveardásašvuođa olles gildii

Norgga ja Suoma rádjá leamašan gitta koronaráddjehusaid geažil, nuba girjebussefálaldat ii leamaš oažžumis guhkes áigái. Girjerádjovirgeolmmoš Iivari Koutonen mielas girjebusse lea dehálaš ovttaveardásašvuođa dihte.

– Gal Ohcejoga gielddas leat guhkes gaskkat. Ii sáhte vuordit, ahte olbmot bastet galledit girjerádjosa dahje finadit girkosiiddas menddo dávjá, dadjá Koutonen.

Iivari Koutonen
Girjerádjovirgeolmmoš Iivari Koutonen mielas girjebusse lea dehálaš ovttaveardásašvuođa dihte. Govva: Kirsti Länsman / Yle

Ohcejoga gielda álggahii ovttasbarggu Deanu ja Unjárgga girjerádjobiillain ođđajagimánus 2020. Dan ovdal gielddas lei ovttasbargu Kárášjoga ja Poršáŋggu gielddain, muhto dat nogai dan maŋŋá, go Norgga Sámediggi mearridii geahpedit iežas ruhtadanoasi Sámi girjebussiin.

Loga eanet: Ohcejoga gielda ii báhcán moraštit juovlamánus heaittihuvvon girjebusse – ođđa girjerádjobiila vuodjá juohke nuppi vahku miehtá gilážiid

Dilli molsašuddá olles áigge koronavirusa dihte

Koronadilli eallá beaivvis nubbái ja ráddjehusaid ložžejit ja čavgejit. Girjebussevuoddji Jan Hansenge ii dáiddeš diehtit beasašgo moatte vahku geažes šat rájá rastá vai ii.

– Dat lea nu, ahte go dáža stenge de dalle eat beasa boahtit, muhto dallego dáža leahku de dalle beassat boahtit. Muhto ferte dalle Suoma bealde vehá korona teasttaid váldit vai beassat deike, muitala Hansen.

Girjebusse lea geargan Ohcejoga dearvvašvuođaguovddáža ja ássanbálvalusa lassin finadit jo Njuorggán skuvllas ja Buolbmátjávrris.

– Dat ledje lihkolaččat go mii bođiimet. Mu mielas orru somá vuodjit Suoma bealde ja go olbmot leat nu positiivvat, dat liikojit go mii boahtit, illuda Hansen.

Jan Hansen
Girjebussevuoddji Jan Hansen mielas orru somá vuodjit fas Suoma bealde. Govva: Kirsti Länsman / Yle

Guhká birjebusse ii goittot sáhte čuožžut ovttasajis. Girjebussevuoddji doapmala fas biilii ruovttoluotta joatkit mátkki.

– Dalle lea beare vuolgit viidásabbot, olbmot leat vuordimin min, hoahkala Hansen vel lohppii.

Guovdageainnu, Eanodaga ja Muonio oktasaš girjebusse lea dán vahku rájes maid beassan vuodjit riikkarájá rastá. Girjebusse vuoddjái maŋŋebárgga Guovdageainnus ja čuovvu dál beaivválaččat dan áigedávvala, mii álgojagis lea almmuhuvvon earret earáid suohkaniid neahttasiidduin.

Áššis oainnát lasi Yle Ođđasat -sáddagis diibmu 15.45. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä