Sápmi |

Suoma PEN-klubba stivrii válljejuvvui dál nuppe háve sámi ovddasteaddji: Oula-Antti Labba bođii Pirita Näkkäläjärvi sadjái

Suoma PEN-klubba válljii gaskavahku ođđa stivrra ja geigii sátnefriijavuođabálkkašumi olmmošriekteáššedovdi Ujuni Ahmedii.

Suoma PEN-klubba stivra 2020
Suoma PEN-klubba stivrralahtut Veera Tyhtilä, Daniel Malpica, Oula Silvennoinen, Elina Hirvonen, Oula-Antti Labba, Heikki Jokinen ja Joonas Maristo. Govas váilot Sabine Forsblom ja Nina Honkanen. Govva: Pirita Näkkäläjärvi

Suoma PEN-klubba stivrras lea maid dán jagi mielde sámi lahttu. Stivrii válljejuvvui jahkečoahkkimis 12.2. sápmelaš jurista ja dutki Oula-Antti Labba.

Labba bođii PEN-klubba stivrii Pirita Näkkäläjärvi sadjái. Ekonoma ja media- ja gulahallandiehtagiid magisttar Pirita Näkkäläjärvi lei vuosttas sápmelaš PEN-klubba stivrras jagi 2019. Näkkäläjärvi lea Yle Sámi ovddeš hoavda ja ođđa Sámedikki lahttu.

Labba lassin Suoma PEN-klubba ođđa stivrralahtut leaba suomaruoŧŧelaš girječálli, doaimmaheaddji ja oahpaheaddji Sabine Forsblom ja arábagiela jorgaleaddji, dutki ja diehtogirječálli Joonas Maristo.

Stivrralahttun jotket čájálmasgirječálli-ealligovvagiehtačálli Veera Tyhtilä (sátnejođiheaddji), filosofiija doavttir ja historjjádutki Oula Silvennoinen (várresátnejođiheaddji), girječálli, dokumeantabagadalli ja doaimmaheaddji Elina Hirvonen, girječálli-giehtačálli Nina Honkanen, friddja doaimmaheaddji, kritihkar ja diehtogirječálli Heikki Jokinen ja diktačálli ja multimediaartista Daniel Malpica.

Suoma PEN lea jagis 1928 vuođđuduvvon girječálliid álbmogiidgaskasaš sátnefriijavuođaorganisašuvdna. Dat gullá álbmogiidgaskasaš PEN-organisašuvdnii, mii doaibmá 100 riikkas. Vuođđogirjjis mielde PEN bealušta ja ovddida girjjálašvuođa sihke dáidaga ja cealkima friijavuođa miehtá máilmmi.

Sátnefriijavuođabálkkašupmi Ujuni Ahmedii ‒ bálkkašupmin Marja Helandera dáidda

Suoma PEN -klubba geigii jahkečoahkkima oktavuođas sátnefriijavuođabálkkašumi olmmošriekteáššedovdi Ujuni Ahmedii.

Ujuni Ahmed lea bargan World Vision -organisašuvnna áššedovdin ja Fenix Helsinki -searvvi doaimmajođiheaddjin. Fenix Helsinki lea máŋggakultuvrralaš suopmelaččaid jienaguottiheaddji ja dat bargá erenoamážit sisafárrejeaddjiid servošiiguin. Ahmed lea hállan olu nissonolbmuid sohkaealániid čuohpadeami vuostá, ja maiddái gudnái laktáseaddji ráddjema ja veahkaválddi vuostá.

Ujuni Ahmed oaččui sátnefriijavuođabálkkašupmin Marja Helandera dáiddaduoji.
Ujuni Ahmed oaččui sátnefriijavuođabálkkašupmin Marja Helandera dáiddaduoji. Govva: Oula-Antti Labba

– Ujuni Ahmed lea jahkeviisáid geavahan iežas sátnefriijavuođa, go son lea bealuštan buohkaid rievtti ovttaveardásaš olmmošrivttiide, ja go son lea geahččalan buoridit daid olbmuid sajádaga, geaid lea váttis bealuštit iežaset rivttiid. Dát lea dagahan dan, ahte Ujuni Ahmed lea heađuštuvvon ja áitojuvvon. Son lea lihkká roahkkadit bargan sátnefriijavuođa ja olmmošvuoigatvuođaid beales, muitalit PEN-klubba dieđáhusas.

– Ujuni Ahmed lea maid doaibman ovdagovvan sidjiide, geaidda sátnefriijavuođa geavaheapmi mearkkaša persovnnalaš riskka.

Sátnefriijavuođabálkkašupmin Ujuni Ahmedii geigejuvvui sámi dáiddár Marja Helandera dáiddaduodji Čázi duohken nubbi máilbmi.

Divvojuvvon 13.2.2019 dii 13:18 jahkečoahkkima beaivemearrin 12.2.

Varrasamosat: Sápmi

Váldoođđasat

Varrasamosat

Muualla Yle.fi:ssä