Sápmi |

Suoma ráđđehusráđđádallamat jođus – Sámedikkis sávvet ráđđehusprográmmii fuomášumi sámegielaide, ealáhusaide ja álgoálbmotjulggaštussii

Sámediggi lea bivdán ráđđádallamiid ođđa ráđđehusvuođuin.

Tiina Sanila-Aikio
Sámedikki ságadoalli Tiina Sanila-Aikio. Govva: Vesa Toppari / Yle Sápmi

Suoma ráđđehusráđđádallamat álge gaskavahku 8.5. Ráđđádallamiin leat mielde Suoma sosiálademokráhtalaš bellodaga lassin Suoma Guovddášbellodat, Ruoná lihttu, Gurutlihttu ja Ruoŧŧelaš álbmotbellodat.

Sámedikki ságadoalli Tiina Sanila-Aikio muitala, ahte sus lea oalle positiiva govva vejolaš ráđđehusvuođus.

– Daid ságastallamiid vuođul, maid mii leat čađahan ovdal válggaid, doppe leat bellodagat, main lea prioritehtan ovddidit maiddái sámeáššiid.

Sanila-Aikio oaivvilda, ahte ovddeš válgabajis Guovddášbellodagas leamaš stuorra dadjamuš sámeáššiide, muhto son vuordá, ahte dán ráđđehusa váldobellodat SDB ja eará bellodagat balanserejit dili.

– Sávan, ahte mii beassat ovdánit máŋggaid sámeáššiiguin. Galhan muhtumin šaddá dat áigi, ahte ferte ovdánit ja váldit lávkkiid ovddos guvlui, jurdila Sanila-Aikio.

Mannan jagi loahpas Sámedikki stivrras mearridedje bálkáhit konsultafitnodaga ovddidit sámeáššiid riikkapolitihkkáriidda ja bellodagaide. Tiina Sanila-Aikio muitala, ahte sii bálkáhedje konsultafitnodaga ráhkadit váikkuheaddji materiála, ja dan sii leat bargan.

– Mii leat ságastallan ovdal válggaid bellodagaiguin ja olbmuiguin, geat ledje iešguđet bellodagain evttohassan. Dál dieđusge sávvat, ahte dat gilvojuvvon siepman addá midjiide buriid vejolašvuođaid ovddidit ráđđehusprográmmii sámiid guoskevaš áššiid.

Sámedikkis leat golbma váldoulbmila

Tiina Sanila-Aikio muitala, ahte Sámediggi lea deattuhan golbma iešguđet ášši ságastallamiin bellodagaiguin.

– Sámegiella lea hirbmat dehálaš oassi sámekultuvrras ja dat dárbbaša doarjaga. Dat guoská juohke áidna sektora dahje oasi servodagas, lei gažaldat oahpahusas, sosiála- ja dearvvašvuođabálvalusain, giellabeassedoaimmain, beaivedivššus dahje masnu earás. Dat lea dieđusge okta stuorra ollisvuohta.

Nubbin Sanila-Aikio máinnaša sámeealáhusaid.

– Mii dárbbašit ollislaš gova sápmelaš ealáhusaid árbevirolaš dieđu birra ja das, mo dálkkádatnuppástus váikkuha, ja mo basttášeimmet politihkain vástidit daidda hástalusaide.

Goalmmát ášši, man Sámediggi lea deattuhan, lea ON álgoálbmotjulggaštusa ollašuhttin Suomas.

Sámediggi lea bivdán ráđđádallamiid

Tiina Sanila-Aikio muitala, ahte Sámediggi lea bivdán ráđđádallamiid ráđđehusvuođuin vai besset ráđđádallat sámiid guoskevaš ulbmiliin ja mihttomeriin.

Okta áigeguovdilis sámeášši, mii vuordá Suoma ođđa ráđđehusa beavddi alde, lea ON:a olmmošvuoigatvuođakomitea Supmii addin čovdosat.

– Dat lea okta dakkár hohpolaš ášši, mii vuordá, ahte Suomas livččii ráđđehus vai beasašeimmet mearridit ovttas dan vuogi, mo dainna áššiin ovdánit.

Suoma sosiálademokráhtalaš bellodaga ságadoalli ja ráđđehusgulaskuddi Antti Rinne mihttomearrin lea, ahte ráđđehusprográmmahámus gárvánivččii maŋimustá 24.5. ja ođđa ráđđehus nammaduvvošii geassemánu álggus.

Varrasamosat: Sápmi

Váldoođđasat

Varrasamosat

Muualla Yle.fi:ssä