Sápmi |

Suoma riektekansler moaitá ráđđehusa doaimmaid Deanu bivdosoahpamušráđđádallamiid oktavuođas

Riektekanslera mielas ráđđehus livčče galgan gullat Sámedikki ovdalgo Suoma ja Norgga gaskasaš ráđđádallamat nohke.

Tenojoki
Govva: Vesa Toppari / Yle

Riektekanslera mielas ráđđehus livčče galgan gullat Sámedikki ovdalgo Suoma ja Norgga gaskasaš ráđđádallamat nohke.

Dalle Sámedikkis livčče lean duođalaš váikkuhanvejolašvuohta soahpamuša sisdollui. Ráđđádallamat goit ledje easka dan maŋŋá go soahpamuš lei juo vuolláičállojuvvon. Ráđđádallamiid healbadeamis guoddalii Sámediggi.

Riektekansler lea Suoma eiseváldi, guhte čuovvu ráđđehusa doaimmaid lágalašvuođa.

Vuođđoláhkaválljogoddi ja riektekansler ovtta oaivilis

Vuođđoláhkaválljogoddi cealká, ahte válljogotti ožžon čielggadusa mielde Deanu bivdosoahpamuša guoski ráđđádallamiid ja soahpamuša fápmuibidjanlága válmmaštallama oktavuođas leat dihto osiin healbadan sámediggelága 9 § ráđđádallangeatnegasvuođa čuovvoleami.

– Válljogoddi cuiggoda cealkámušastis, ahte láhkaođastusaid válmmaštallamis galgá váldit vuhtii sápmelaččaid gullangeatnegasvuođa áššiin, main lea stuorra mearkkašupmi sámiid rivttiide.

– Suoma riikkabeaivvit goittotge leat mearridan dohkkehit vuosttas gieđahallamis Deanu bivdosoahpamuša ja dasa gullevaš fápmuibidjanlága, vaikko sii leat diehtán, ahte ráđđádallangeatnegasvuohta lea muhtin osiin healbaduvvon.

Sámediggái livčče galgan várret duođalaš váikkuhanvejolašvuođa

Riektekansler searvá vuođđoláhkaválljogotti cealkámussii das, ahte sámediggái galgá dahkidit váikkuhanvejolašvuođa Deanu soahpamuša áššemeannudeapmái.

– Geahčan seamma láhkai go vuođđolahkaválljogoddi, ahte eanan- ja meahccedoalloministeriija lea dihto osiin healbadan sámediggelágas mearriduvvon ráđđádallangeatnegasvuođa čuovvuma. Golggotmánus 2016 dollojuvvon ráđđádallamiin lea sámediggi duođalaččat bastán ráđđádallat dušše soahpamuša fápmuibidjama gulli gažaldagain.

Riektekanslera mielas nu soahpamušas, maiddái go dan sisdoalus livčče galgan beassat ráđđádallat ovdal go Suoma ja Norgga gaskasaš ráđđádallamat ledje heaittihuvvon. Dalle sámedikki livčče albmáláhkái beassan váikkuhit soahpamuša sisdollui, ja váikkuhan vejolašvuohta livčče lean duođalaš.

– Geahčan, ahte áššemeannudeapmi ii maid dán oasil lean vuođđolágas ja hálddahuslágas oaivvilduvvon buorre hálddahusvuogi mielde áššálaččat lágiduvvon. Gidden maid fuopmášumi eanan- ja meahccedoalloministeriija doaimmaide dan oasil, mii guoská áššimiel lágiduvvon ráđđádallamiid sihke hálddahuslága njuolggadusaide ja buorre hálddahusa guoski riekteulbmiliidda, čállá riektekansler mearrádusastis.

Varrasamosat: Sápmi

Váldoođđasat

Varrasamosat

Muualla Yle.fi:ssä