– Mun lean dan oaivilis, ahte mii livččiime galgan joatkkaráđđádallamiid sihtat dán olles proseassas. Dat dála evttohus dálá hámis mu mielas ii leat aivve dohkkehahtti sámiide ja dan suomabeale sámi servodat maid čájehan čielgasit. Ja dat mu mielas mielddisbuktá dasto dan, ahte mii fertet geahččalit joatkkaráđđádallamiid oažžut áigái.
"Orru issoras"
Maiddái sámediggeáirras Magreta Sara mielas áššis galggašii vel ráđđádallat.
– Doppe ledje nu olu dakkár stuorra áššit mat leat hui váddásat dohkkehit sámedikki lahtuide. Goit munnje, ja gullui máŋggaide earáidenái, oaivvildii Sara čoahkkima bottus mánnodaga.
"Ráđđádallamat nohkan"
Suoma riekteministeriija ossodathoavda Johanna Suurpää ii lohpit goit ođđa ráđđádallamiid sápmelaččaide. Evttohus lea dál dan hámis go lea. Stáhtat eai leat gárvásat álgit šat ráđđádallat sisdoalus árvala son.
– Dán bottus ráđđádallamat leat nohkan. Ii leat šat ráđđádallanmandáhta, dát lea dat ráđđádallanboađus. Dan in dieđusge sáhtte ollásit ávaštallat, ahte sáhtášiigo muhtin oasil vuolgit vel ođđasit ráđđádallat, muhto doalan dan vejolašvuođa gal hui váigadin. Dás lea hui máŋgga jagi proseassa mannon čađa ja dása oktasaš kompromissii, ráđđádallanbohtosii leat dál boahtán.
