Sápmi |

Suoma riekteministeriija vihkkehallá sámediggeválggaid sirdima – Ministeriija lea bovden sámeservviid ja Sámedikki gullandilálašvuhtii ášši olis

Gullandilálašvuohta ordnejuvvo duorastaga Helssegis.

Johanna Suurpää
Riekteministeriija ossodathoavda Johanna Suurpää lohká sin bovden duorastaga dilálašvuhtii dakkár olbmuid, geain jáhkket leat oainnut ášši ektui. Govva: Sara Wesslin / Yle

Riekteministeriija lea bovden Sámedikki ja sámeservviid gullandilálašvuhtii, mii laktása sámediggeválggaid áigetávvalii. Gullandilálašvuohta ordnejuvvo duorastaga, geassemánu 6. beaivve.

Boahttevaš sámediggeválggat galget leat čakčat, muhto Sámediggi ja eará váidaga dahkan olbmot leat evttohan válggaid sirdima, vai sámediggeláhka gearggašii válbmanit ođđa válggaide.

Riekteministeriija ossodathoavda Johanna Suurpää muitala, ahte vuossárgga almmustuvvon ráđđehusprográmma mielde Suoma stáhta áiggošii gieđahallat boahttevaš sámediggeválggaid sirdimii laktáseaddji áššiid jođánamos lági mielde.

Suopma oaččui álgogiđa guokte čovdosa ON:a olmmošriektekomiteas, main gehčče ahte Suoma stáhta lea loavkašuhttán sápmelaččaid rivttiid.

Čovdosat gusket alimus hálddahusrievtti mearrádusaid jagi 2015 sámediggeválggaid oktavuođas. Dalle alimus hálddahusriekti dohkkehii válgalogahallamii 93 olbmo, geaid ohcamušaid Sámedikki válgalávdegoddi ja stivra lei hilgon.

– Dát lea boktán gažaldaga, galggašiigo dál de árvvoštallat dáid čuovvovaš sámediggeválggaid áigedávvala ja dasa laktáseaddji meannudeami. Dát gullandilálašvuohta lea ordnejuvvon čielggadan dihte iešguđet oassebeliid oainnuid.

– Dilálašvuhtii leat bovden dakkár oassebeliid, geain sáhttit árvvoštallat leat oainnut dán gažaldahkii, lasiha Suurpää.

Válggaid sirdimis ii goittotge leat vel dahkkon makkárge mearrádus.

– Mis lea dát ráđđehusprográmmalinnjen dál dán muttus. Go válggat álget čakčat, de dieđusge dán čielggadanbarggu galgá dahkat johtilit, muitala Suurpää.

Juuso: Orru ahte Suopma váldá ON:a olmmošvuoigatvuohtakomitea mearrádusa vuhtii

Sámedikki nubbi várreságajođiheaddji Tuomas Aslak Juuso mielas lea áinnas buorre, go riekteministeriija bargagođii áššiin dalán ráđđehusprográmma gárvvásmuvvama maŋŋá.

– ON:a olmmošvuoigatvuohtakomitea mearrádus geatnegahttá Suoma bargat áššiin, orru ahte stáhta váldá dan duođas ja sihkkarastá doaimmaid dan ektui.

Tuomas-Aslak Juuso
Tuomas Aslak Juuso illuda, go ášši gieđahallagohtet. Govva: Vesa Toppari / Yle

Vuosttas lávkki dan proseassa lea čielggadišgoahtit sápmelaččaid jurdagiid válggaid sirdima ektui, jus čielggadeami bohtosiin gávnnahit ahte sirdin lea vejolaš, de dat galgá dohkkehuvvot vel Sámedikki dievasčoahkkimis ja riikkabeivviin. Juuso árvala, ahte jus sámediggeválggaid sirdet, válggat livčče beannot-guovtti jagi geažes.

– Dan ferte oaidnit maid čielggadanbarggus gávnnahit, makkár bohtosat bohtet. Válggaid sirdimis livččii maid dat positiiva váikkuhus, guvttin jagiin válggaid sirdimiin mis livčče válggat seamma jagi go Ruoŧa sámediggeválggat ja seamma áigge go Norgga sámediggeválggat.

Varrasamosat: Sápmi

Váldoođđasat

Varrasamosat

Muualla Yle.fi:ssä