Sápmi |

Suoma Sámediggeválggaid boađus čielgá golggotmánu vuosttas beivviid – geahča válgajagi áigetávvala dás

Suoma sápmelaččat ožžot boahtte čavčča ođđa politihkalaš ovddasteaddjiid.

Válggat
Sámediggeválggaid jienaidlohkan jagi 2015. Govva: Martta Alajärvi / Yle

Suoma Sámedikkis lea válgajahki.

Sámediggi lea almmuhan neahttasiiddustis válgajagi áigetávvala. Válgalávdegoddi dieđiha válggaid birra vel maŋŋelabbos lasi sihke neahttasiidduinis, sámiid ruovttuguovllu áviissain ja Helsingin Sanomat ja Kaleva -áviissain.

Válgalogahallan

Sámedikki válgalávdegoddi nanne ođđa válgalogahallama, nappo listtu das, geain lea vuoigatvuohta jienastit ja álgit evttohassan boahtte čavčča sámediggeválggain, guovvamánu loahpas. Válgalogahallamii merkejuvvon sápmelaččat ožžot almmuhusa vuoigatvuođas njukčamánus.

Válgalogahallan lea buohkaid oaidninláhkai njukčamánu loahpabealde, válgalávdegoddi almmuha báikkiin maŋŋelabbos almmolaš gulahusain.

Jus olmmoš ii leat duđavaš válgalávdegotti mearrádussii válgalogahallama ektui, sáhttá válgalogahallamis dahkat njulgengáibádusa masá cuoŋománu beallemuttu rádjai.

Evttohasa ásaheapmi

Evttohasa sámediggeválggaide sáhttá ásahit válljenovttastus, man leat vuođđudan golbma sápmelačča. Evttohasásaheami várás devdojuvvo skovvi, mii máhcahuvvo válgalávdegotti doaimmahahkii maŋimustá borgemánu álggus.

Válgalávdegoddi gieđahallá evttohasaid válgagelbbolašvuođa, ráhkada evttohaslisttu ja almmustahttá dan jođánamos lági mielde borgemánus.

Evttohasásaheami álgimis dieđihuvvo maŋŋelabbos almmolaš gulahusain. Mannan válggain jagi 2015 evttohasásaheapmi álggii geassemánus.

Jienasteapmi

Válgaáššebáhpárat sáddejuvvojit jietnavuoigadahtton olbmuide poastta miel čakčamánu álggus. Jienasteapmi bistá masá olles čakčamánu, 2.9.–30.9.2019.

Sámediggeválggain sáhttá jienastit jogo poastta bokte, máhcahemiin válgaáššebáhpáriid persovnnalaččat válgalávdegotti doaimmahahkii dahje jienastemiin virggálaš válgabeaivve jienastanbáikkiin. Sámedikki válgalávdegoddi dieđiha virggálaš válgabeaivve birra eanet maŋŋelabbos.

Dárbbu mielde válgalávdegoddi ordne jienastanvejolašvuođa sámiid ruovttuguovllus olbmuide, geat leat divššus lágádusas dahje ruovttus.

Válgaboađus nannejuvvo golggotmánu 2. beaivve.

Dehálamos beaivemearit

28.2.2019Válgalávdegoddi nanne válgalogahallama
4.3.2019Almmuhankoarttat jienastanvuoigatvuođas postejuvvojit jietnavuoigadahtton olbmuide
18.–29.3.2019Válgalogahallan lea oaidninláhkai
12.4.2019 ovdal dmu 16Válgalogahallama njulgengáibádusa galga doaimmahit válgalávdegoddái
2.8.2019 ovdal dmu 16Evttohasa ásaheapmi nohká
2.9.–30.9.2019Válggaid doaimmaheapmi
2.10.2019Válgalávdegoddi nanne válggaid bohtosa


Válggat leat juohke njealját jagi

Sámediggi lea Suoma sápmelaččaid alimus politihkalaš orgána, mii ovddasta sápmelaččaid sihke riikkadási ja riikkaidgaskasaš oktavuođain.

Sámedikki 21 lahtu ja njeallje várrelahtu válljejuvvojit juohke njealját jagi válggaiguin. Sápmelaččaid ruovttuguovllu juohke gielddas válljejuvvojit Sámediggái uhcimustá golbma ovddasteaddji.

Válggain ožžot jienastit dat sápmelaččat, geat leat merkejuvvon Sámedikki válgalogahallamii. Jietnavuoigadahtton sápmelaččat leat maiddái válgagelbbolaččat ja sáhttet álgit válggain evttohassan.

Varrasamosat: Sápmi

Váldoođđasat

Varrasamosat

Muualla Yle.fi:ssä