Kaikki talviolympialaisista!
Sápmi |

Suoma Sámedikkis lea nollatoleránsa seksuála heađušteapmái

Norgga Sámedikkis logenar olbmo leat gártan vásihit seksuálalaččat unohas láhttema. Suoma Sámedikki ságadoalli muitala, ahte seksuála heađušteapmi gávdno juohke sajis.

Jietna: Tiina Sanila-Aikio
Jietna
Suoma Sámedikkis lea nollatoleránsa seksuála heađušteapmái.

NRK Sápmi ráhkadii gažadeami Norgga beale Sámedikki dálá ja ovddeš áirasiidda ja bargiide das, ahte leago oktage sis vásihan seksuálalaš unohas láhttema. Oktiibuot 79 olbmo ožžo dan gažadeami, ja dasa vástidedje 34 olbmo. Logi vástideaddji muitaledje iežaset leat vásihan juoganulágan seksuála unohisvuođaid, ja gávccis sis ledje vásihan dan politihkalaš doaimmaid oktavuođas.

Suoma Sámedikki ságadoalli Tiina Sanila-Aikio lohká, ahte Suoma Sámediggi ii dohkket ollenge makkárge seksuála heađušteami dahje unohas láhttema. Dađibahábut dákkár láhtten gávdno juohke sajis, muitala Sanila-Aiko.

– Dat soaitá dáhpáhuvvat daguiguin dahje sániiguin, ja mun jáhkán dákkár dáhpáhusat leat leamašan. Jus dákkár dáhpáhusat šaddet, de Sámedikkis lea nollatoleránsa dákkáriidda, deattuha Sanila-Aikio.

Jus Sámediggi oažžu almmuhusa dákkár ilgadis dáhpáhusas, de Suoma Sámediggi gieđahallá dan dalán.

– Dieđusge dat lea dilis gitta, muhto mii gullat oassebeliid ja dat ovdána dasto Sámedikki siste vuos hálddahusdásis, de stivrii ja vel dievasčoahkkimii, jus lea dárbu, čilge Sanila-Aikio.

Mii dáhpáhuvvá, jus soames Sámedikki áirasiin, bargiin dahje eará luohttámušolbmuin gávnnahuvvo sivalažžan dákkár heađušteapmái? Mo Sámediggi doarju su, guhte lea gártan vásihit dákkár unohas dáhpáhusa? Guldal Yle Areenas.

Norgga Sámedikki dáhpáhusain lea leamašan sáhka dán vahku Buorre Iđit Sápmi -sáddagiin. Daid sáhttá guldalit Yle Areenas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä