Sápmi |

Suomabeale Sámis gesset dán vahkus rukses linjáid Jiekŋameara ruovdegeainnu vuostá – "Otná beaivve sápmelaš ii bala čuožžumis dákko"

Rukses linjáiguin háliidit konkrehtalaččat čájehit rájáid Sámi luonddu suodjaleami bealis.

Red line -protesti Vuotsossa 4.9.2018
Petra-Biret Magga-Vars mielas lea dehálaš loktet oidnosii áššiid, mat gusket sápmelaččaid. Govva: Inger-Elle Suoninen / Yle

VUOHČČU Vuohču gili lulábealde jeakkis ruoksá maŋŋebárveaigin olmmošlinjá. Rukses biktasiidda gárvodan olbmot leat čoahkkanan čájehit, ahte sii eai dohkket plánejuvvon Jiekŋameara ruovdegeainnu dáid guovlluid čađa.

Suoma Sámi Nuorat, Greenpeace ja Suohpanterror ovttas báikkálaš servošiiguin ceggejit dán vahkus seammalágan rukses linjáid viđa iešguđet báikkis: maŋŋebárgga Vuohčus, gaskavahku Anáris, duorastaga Muttošjávrri bálgosis, bearjadaga Sieminkurtte gárddi luhtte Čeavetjávrris ja lávvardaga Juhháán Kuátsaijávrris Muttošjávrri bálgosis.

Red line -protesti Vuotsossa 4.9.2018
Rukses linjá láhkenis lohká, deike ii beasa. Govva: Inger-Elle Suoninen / Yle Sápmi

Proteastadáhpáhusaid ráiddu álggahii gaskavahku Vuohčus Lappi bálgosa vuolit siida. Boazodoalli Petra-Biret Magga-Vars lei duđavaš organisašuvnnaid ovttasbargui.

– Dát čalmmustahttin galgá álgit dáppe, gos álgá sámeguovlu. Mii leat deaivvadan ovdal ja plánen dan, ja mu mielas lea buorre ja nanu ovttasbargu searvat dákkár doibmii.

– Muhtimin mii eat sáhte eará go čalmmustahttit dan, mii lea midjiide deháleamos. Ferten gal giitit, go dákkár organisašuvnnat sáhttet hui bures čalmmustahttit dan, mii lea álgoálbmogiidda dehálaš, Magga-Vars jurddaša.

Red line -protesti Vuotsossa 4.9.2018
Red line -proteasta Vuohčus čakčamánu 4. beaivve. Govva: Inger-Elle Suoninen / Yle Sápmi

Red line -protesti Vuotsossa 4.9.2018
Govva: Inger-Elle Suoninen / Yle Sápmi

Greenpeace čájeha govaid ja videoid máilbmái

Rukses linjá šaddá, go olbmot čuččot rukses biktasat badjelis ráiddus dego bisseheame juoidá. Banderollatges muitalit sin oaivila.

Go ráidu lea sajis, álget Greenpeace kámerat govvet. Govaiguin ja filmmaiguin Greenpeace áigu doalvut dán sáni viidáset máilbmái, muitala Greenpeace vuovdeáššedovdi Matti Liimatainen.

Red line -protesti Vuotsossa 4.9.2018
Matti Liimatainen. Govva: Inger-Elle Suoninen / Yle

– Dát báikkit leat maiddái midjiide dehálaččat. Ruovdegeaidnu duššadivččii luonddu.

– Mii leat jagi 2002 rájes bargan ovttas boazodolliiguin dáppe ja Anáris suodjalandihte mehciid. Máŋgga sajis ruovdegeaidnu manašii daid mehciid čađa, maid mii leat suodjalan, Liimatainen muitala.

Red line -protesti Vuotsossa 4.9.2018
Govva: Inger-Elle Suoninen / Yle Sápmi

Red line -protesti Vuotsossa 4.9.2018
Govva: Inger-Elle Suoninen / Yle Sápmi

"Otná beaivve sápmelaš ii bala čuožžumis dákko"

Go govaid ja filmmaid leat ožžon, ii báikái báze ii mearkage rukses linjás. Vaikko buohkat eai soaitte juogadit sin oainnu Jiekŋameara ruovdegeainnus, lea Magga-Vars goit ráhkkanan vuosteoainnuidege.

– Mii eallit juo dakkár servodagas, ahte vuosttildeapmi lea juohkebeaivválaš. Dat ii leat midjiide miige ođas, iige dat leat vuosttaš ášši, mainna mii bártidit.

– Mii leat bártidan juo historjjás ja duon doloža rájes oba máŋgii. Mun jáhkán, ahte otná beaivve sápmelaš gii vuolgá vaikko dása čuožžut, ii bala das, smiehtada Petra Magga-Vars.

Geahča ášši Yle Ođđasiin Yle Areenas

Varrasamosat: Sápmi

Váldoođđasat

Varrasamosat

Muualla Yle.fi:ssä