Sápmi |

Suomas čuvvot fuolas Davvi-Ruoŧa koronadili – Norgalaš aviisa: Olgoriikalaš turisttat njáhket Norgii Ruoŧa bokte

Maŋimuš vahku áigge Davvi-Ruoŧas leat gávnnahan badjel 200 koronanjoammuma.

Haaparanta
Johtolat Suoma ja Ruoŧa rájá alde lea lassánan álgogeasi áigge. Govva: Simon Eliasson / Yle

Lappi buohccedikšunbires leat fuolas koronavirusis, mii leavvá Davvi-Ruoŧas, muitala Lappi njoammudávddaid bajimuš doavttir Markku Broas Lapin Kansa -avisii.

Sii leat dál bivdán Norrbottena leanas dieđuid, main muitalivčče man olu guđege Davvi-Ruoŧa gielddas leat njoammumat. Dát dieđut veahkehivčče Lappi ja Oarje-Lappi buohccedikšunbiriid kártet njoammumiid.

Maŋimuš vahku áigge Davvi-Ruoŧas leat gávnnahan badjel 200 koronanjoammuma. Oarje-Lappi buohccedikšunbires leat leamašan moatti vahku áigge moadde koronanjoammuma, dain navdet oktavuođa Ruŧŧii.

Broas mielde visot dušši mátkiid Ruŧŧii galgá garvit. Jus lea bággu fitnat Ruoŧas, Broas ávžžuha leat guovtti vahku karantenas.

Váhčiris vihtta buohcceviessobargi leat addán positiivalaš koronačájánasa

Davvi-Ruoŧas Norrbottena Váhčira buohcceviesus koronabuohcciiguin bargan bargiid leat testen čielggadandihte njoammumiid. Koronaiskosa leat váldán 200 bargis ja viđas sis leat gávnnahan koronavirusa.

Ruoŧa riikkaradio SVT mielde sii leat jáhkkimis ožžon njoammuma astoáiggis buohcceviesu olggobealde.

Ruoŧŧelaš aviisa Dagens Nyheter muitalii mannan vahkus, ahte koronanjoammumat livččejit leavvan Váhčira buohcceviesus, go koronabuohcciid ja eará buohcciid leat bidjan buohcceviesus seamma geardái. Norrbottena eiseváldit goit šiitet dan dieđu. Sin mielde riska koronanjoammumiid leavvamii lea unni buohcceviesu siste.

Sisáššiidministtar: Ráđđehus gárvvis smiehttat lasseráddjehusaid Oarje-Lappi guvlui

Sisáššiidministtar Maria Ohisalo lea mannan vahkus ráđđádallan eará Davviriikkaid sisáššiidministtariiguin videočoahkkimis. Čoahkkimis gieđahalle earet eará rádjejohtolaga ráddjehusaid dálá dili.

Ohisalo mielde Suoma ráđđehus lea gárvvis árvvoštallat, galgágo váldit atnui čavgadut ráddjehusaid Oarje-Lappi guovllus, jus dearvvašvuođaeiseváldit árvalit dili gáibidit dan.

Norgalaš aviisa: Olgoriikalaš turisttat njáhket Norgii Ruoŧa bokte

Olgoriikalaš turisttat vurdet, ahte Ruoŧa ja Norgga rádjegohcinbáikkit guorranit eahkes bargiin ja de vuojestit Lofohtaide, nu čállá norgalaš VG-aviisa.

Nárviikka sátnejođiheaddji Rune Edvardsen lea fuolas, ahte koronavirus njoammu guvlui lobihis rádjerasttildemiid dihte.

– Mii diehtit, ahte dávda njoammu Davvi-Ruoŧas, go mis fas eai leat njoammumat. Mii leat bargan buorre barggu eastadit njoammumiid, livčče suddu jus dávda njoammu deike dákkár turisma dihte, dadjá Edvardsen.

Varrasamosat: Sápmi

Váldoođđasat

Varrasamosat

Muualla Yle.fi:ssä