Sápmi

Suomas ložžejit vuot mátkkoštanráddjehusaid – fitnodatdoallit eai goittot leat vel vuordimin stuorra turistameriid Anárii

Kaisu Nikula
Kollehovi-hotealla oamasteaddji Kaisu Nikula Anáris muitala, ahte buot olgoriikalaččat leat sis sirdán várrejumiid boahtte geassái. Govva: Kirsti Länsman / Yle

Vuossárgga 13.7. rájes ráját rahpasit ovdamearkka dihte Hollándii, Duiskii ja Kiinnái.

Suoma ráđđehus mearridii mannan vahkus ložžet mátkkoštanráddjehusaid. Otná vuossárgga rájes rahpasit ráját čuovvovaš riikkaide:

  • EU-riikkat ja Schengen-guovlu: Hollánda, Belgia, Itália, Irlánda, Nuortariika, Greika, Malta, Duiska, Slovenia, Slovakia, Ungár, Šveica ja Liechtenstein.
  • Eará riikkat: Algeria, Austrália, Georgia, Japána, Aotearoa dahjege Ođđa-Selánda, Ruanda, Mátta-Korea, Thaieana, Tunisia, Uruguay ja Kiinná.

Dáid riikkaid dávdadilli lea árvvoštallon doarvái buorrin. Kriteran leamaš, ahte guovtti vahku sis leat gávnnahuvvon vuollel gávcci njoammuma 100 000 olbmo vuollai.

Daid lassin friija johtolat lea lobálaš maiddái Suoma ja Kyprosa, Andorra, San Marino ja Vatikána gaskal.

Suomas lea sáhttán jo geassemánu 15. beaivve rájes mátkkoštit friija Norggas, Dánmárkkus, Islánddas, Estteeatnamis, Latvias ja Liettuas. Dáid riikkain boahtti olbmuin eai gáibit eaktodáhtolaš karantena.

Olgoáššiidministeriija goittotge muittuha, ahte vaikko Suopma leage ložžen ráddjehusaid ja ovdamearkka dihte luohpan sisrájáid gohcimis dihto riikkaid oasil, de soitet eará riikkain leat ain iežaset ráddjehusat.

Fitnodatdoallit eai leat vel vuordimin stuorra turistameriid

Kollehovi-hotealla oamasteaddji Kaisu Nikula Anáris muitala, ahte buot olgoriikalaččat leat sis sirdán várrejumiid boahtte geassái, muđui sis gal livčče olu mátkkošteaddjit justa dain riikkain.

– Jáhkán, ahte mátkkošteaddjit eai vel duostta vuolgit gosage. In máhte gal einnostit goas mátkkošteaddjit dustet boahtit, dat soaitá leat čakča dahje dálvi. Dan oaidná dasto, lohká Nikula.

Nuppi anárlaš fitnodagas, Visit Inaris lea oalle seammalágán dilli. Olgoriikalaččat eai leat dahkan várrejumiid ollenge, muhto suopmelaš turisttat gal leat jođus. Visit Inaris jáhkket, ahte olgoriikalaččat easkka dál plánegohtet reaissuid.

Guovtti riikka ássi ii bala mátkkoštit

Marja-Liisa Olthuis orru bearrašiinnes Hollándas. Son johtá olu Suoma ja Hollándda gaskka earet eará bargguid dihte. Mátkkoštanráddjehusat koronaáigge eai leat váikkuhan goittot su johtimii, Olthuisis lea Suoma pássa.

Koronaáiggege Olthuis lea oktii finadan Suomas ja dat leige oalle erenomáš vásáhus.

– Olles Amsterdama girdinšillju lei áibbas guorus. Dat lea hui dievva dábálaččat. Dorvodárkkisteamis mun ledjen áidna ja dasto go bessen nuppe beallái, de doppe ii lean ii oktage siellu. Buot restoráŋŋat ja bárat ledje gitta, oktage gávpi ii lean rabas, eaige doppe lean olbmotge, muittaša Olthuis.

Marja Liisa Olthuis
Marja-Liisa Olthuis johtá olu Suoma ja Hollándda gaskka. Govva: Yle / Anja Kaarret

Otná rájes lea su bearašlahtuinge vejolaš mátkkoštit Supmii. Mátkkoštanráddjehusaid áigge eai leat gártán jurddašit mátkkošteami eaige dan, mo dat livčče lean oba vejolašge dalle, muitala Olthuis.

Son ii goittotge bala mátkkoštit, vaikko koronavirusdávda beakkehage máilmmis ain leavvamin. Olthuis lea vahkuloahpa áigge girdán Hollándas Supmii.

– Galhan mun livččen dieđus geahččan, jus dilli livčče leamašan vearrát, de livččen jurddašan guktii. Dieđusge dat lea juohke sajis, iihan dás dieđe oktage olmmoš dán máilmmis, ahte man guhká dat bistá, smiehtada Olthuis.

Norggasge ložžejit mátkkoštanráddjehusaid dán vahkus

Norgga ráđđehus doalai mannan bearjadaga dieđihandilálašvuođa, gos muitaledje earet eará ođđa mátkkoštanrávvagiin, muitala NRK. Suoidnemánu 15. beaivve rájes sáhttet norgalaččat mátkkoštit karantena haga ovdamearkka dihte Espanjai, Greikai ja Duiskii.

Dieđihandilálašvuođas bođii maid ovdan, ahte Norga rahpá rájáid muhtin báikkiide Ruoŧas, nu ahte norgalaččat sáhttet daidda báikkiide mátkkoštit nu, ahte eai šatta erremii. Dát báikkit leat Skåne, Blekinge ja Kronoberg, muitala Ávvir-aviisa.

Varrasamosat

Muualla Yle.fi:ssä