Sápmi |

Suomas Sámi gielddat vuoruhit sierra láhkái iešguđet ahkásaččaid koronaboahkuhemiid – Ohcejogas boahkuhišgohtet badjel 70-jahkásaččaid juo dán vahkus

Sosiála- ja dearvvašvuođafuolahusa bargiid boahkuhemiid leat álggahan juo ovdalis.

Markku Halonen sai koronarokotteen
Ohcejoga gieldda vuosttas koronaboahkuid oaččui Markku Halonen ođđajagimánu 7. beaivve. Govva: Anneli Lappalainen / Yle

Sámegielddaid koronaboahkuid addintákta lea iešguđetlágan.

Ohcejoga gielda lea dieđihan, ahte dat boahkuhišgoahtá badjel 70-jahkásaččaid ja riskajoavkkuide gullevaš olbmuid juo dán vahku duorastaga, ođđajagimánu 20. beaivve. Boahkuheamit joatkašuvvet loahppavahkus ja viidásabbot boahtte vahkus.

Ohcejoga boahkuhanáigedávvalis lasi diehtu gieldda neahttasiiddus.

Anáris ja Eanodagas boahkohišgohtet vuos badjel 80-jahkásaččaid

Anára gielda ii leat velá áigumin dán ja boahtte vahkus boahkuhit 70-jahkásaččaid. Anár lea dieđihan, ahte vuosttasin boahkuhišgohtet badjel 80-jahkásaččaid ja riskajoavkkuide gullevaš olbmuid. Boahkuhusaid addin sidjiide álgá vahkus njeallje ja vihtta nappo vahku maŋŋelis go Ohcejoga gielddas.

Maiddái Eanodaga gielddas boahkuhišgohtet sosiála- ja dearvvašvuođafuolahusa bargiid maŋŋá vuosttasin 80-jahkásaččaid ja riskajoavkkuide gullevaš olbmuid. Čuovvovažžan Eanodaga gielddas koronaboahkuid ožžot badjel 75-jahkásaččat ja goalmmádin boahkuhuvvojit badjel 70-jahkásaččat.

Soađegilli ii leat velá dieđihan dárkilis boahkuhanáigedávvala

Soađegili gielda lea dieđihan, ahte dat álgá boahkuhit vuosttasin sosiála- ja dearvvasvuođasuorggi bargiid. Eará gieldalaččaid boahkuhanáigedávvala eai leat velá almmuhan.

Gieldda neahttasiiddu mielde Soađegili gielda čuovvu boahkuhanáigedávvalis Suoma koronastrategiija, man mielde vuos boahkuid ožžot sodebargit, geat dikšot COVID-19-buohcciid ja buorrásiid. Earáide boahkuid fállet easkka dan maŋŋá.

Buot Sámi gielddain sodebargiid boahkuheamit leat álggahuvvon ođđajagimánu vuosttas dahje nuppi vahkus.

Lappi guovllu gielddaide juhkkojuvvon váile 2 000 boahkuhanávdnasa

Davvin Lappi buohccedikšunbires leat juohkán mannan vahku loahpá rádjái 1 750 boahkuhanávdnasa.

Lappi guovddášbuohcceviesu infekšuvnadoavttir Markku Broas dadjá, ahte dán vahkkui leat boahtimin lasi boahkuhanávdnasat.

– Dán vahkkui leat diŋgon boahkuid 2 500 čuggestaga ovddas.

Dán rádjái buot Lappi guvlui doaimmahuvvon boahkuhusat leat leamaš Phizer & BioNTech -boahkuheamit. Dán vahkus Lappi gielddaide leat doaimmahan maiddái 4 800 Moderna boahkuhanávdnasa.

Varrasamosat: Sápmi

Váldoođđasat

Varrasamosat

Muualla Yle.fi:ssä