Sápmi |

"Suomas sámi kulturmearreruđat leat dušše moalut"

Suoma Sámediggi almmustahtii gieskat jahkásaš kulturmearreruđaid. Ovttat olbmuide juolluduvvon kulturdoarjagiid supmit leat moatte duhát euro birrasis. Dát ii leat doarvái vai sámi dáiddaeallin ceavccašii oaivvilda dáiddár ja duojár Petteri Laiti Anáris.

Video: Yle Ođđasat

Suomas sámi dáiddárat fertejit birget moaluiguin. Anárlaš duojár ja Suoma Sámi dáiddasearvvi ságadoalli Petteri Laiti, Mihku Biehtára mielas unna ruhtadoarjagat leat dego livčče lottiid biebmamin. Eandalit nuoraide galggašii čájehit, ahte dáiddaeallin lea dehálaš oassi servodaga ja dan bokte maid bastit ealihit iežas. 

– Min nuoraide galggašii addit eambbo vejolašvuođa, eandalit dál go lea bargguhisvuohta eaige váldde gosage bargui. Skuvllaid vázzet ja čehppodat livčče ollašuhttit ollu áššiid, daidda galggašii addit vejolašvuođa, muhto dál dat oppa áigge čuhppojuvvo ja goariduvvo oppa Suoma álbmot.

Suoma Sámediggi lea maŋimuš jagiid áigge juolludan kulturdoarjagiid jahkásaččat vádjit 180 000 euro. Dán jagi ledje boahtán 90 ruhtaohcamuša. Buohkaide ii juolo kulturmearreruhta, muhto ii gánnet dan dihtii šlundut jeđđe sadjásaš kulturčálli Riitta Orti-Berg.

– Dieđusge mun sávan, ahte sii ohcet maid boahttevuođas go dat leat duođai buorit, dat eai leat báhcán dan dihtii oaččokeahttá, ahte dat ii livčče dakkár dehálaš ja buorre jurdda, prošeakta. Hálidan ja sávan ahte ain barget dan ovdii ja ohcet eará sajis ruhtadeami.

Ovttat olbmuid ožžon sámi kulturdoarjaga sturrodat lea 1 900 euros 4 000 euroi. Dáinna ruđain ii birge jagi, jus barggusge gártá báhcit eret oaivvilda Mihku Biehtár.

– Dat galggašii leat seamma dásis go váldoálbmoga dáiddaduvdagat. Doppe lea diekkár 20 000 euro jagi bargostipeanda sullii.

Geahča otne lasi áššis Yle ođđasiin diibmu 15.10.

Varrasamosat: Sápmi

Váldoođđasat

Varrasamosat

Muualla Yle.fi:ssä