Sápmi |

Suopma bisuha sámiid iešmearrideami doarjagiid dálá dásis

Suoma ráđđehus almmustahtii otne duorastaga bušeahttaárvalusa boahtte jahkái.

Hallituksen Budjettiriihen tiedotustilaisuus
Ministerrat Petteri Orpo, Juha Sipilä ja Sampo Terho čilgejedje ráđđehusa budjeahttačovdosiid 31.8.2017 Helssegis. Govva: Jarno Kuusinen / AOP

Stáhtaminister Juha Sipilä (guovddáš), ruhtadoallominister Petteri Orpo (olgeš) ja Eurohppá-, kultur- ja valástallanminister Sampo Terho (aliđat) almmuhedje Suoma stáhtaráđi budjeahttačovdosiid duorastaga diibmu 13 Helssegis.

Ministeriiat leat juo buriin áiggiin válbmen iežaset surggiiid ruhtageavahanplánaid. Gaskavahku ja duorastaga stáhtaráđi ministerat vel ráđđádalle budjeahta loahpalaš čovdosiin. 

Budjeahttaárvalusas sámiid kulturiešmearrideapmi oidno nu mo ovdalge

Doarjja sápmelaččaid kulturiešmearrideami bajásdoallamii lei bisson seamma momenttas go ovdalge. Doarjaga sturrodat lea dárkket 3 317 000 miljon euro, eanemustá. 

Nuoraidbarggu doarjagiid momenttas Suoma stáhtta laige boahtte jagige 700 000 euro sápmelaččaid kultur- ja giellabeassedoibmii. Sierra čuokkisin ruhtadoalloplánas lea vel 200 000 euro mearreruhta kultur-ja giellabeassedoibmii sámeguovllu olggobealde.

Sápmelaččaid nuoraidráđi doaibma ja sámegielat nuoraidkultuvrra Suoma stáhtta doarju ruhtaspealuid vuoitováriiguin.

Sámegielat oahppaávdnasiid buvttadeami stahtadoarjja Sámediggái bissu jagis 2018 ain 500 000 euros.  

Jagi 2018 stáhta budjeahtas Sámediggi fidne 200 000 euro jagi 2019 sámediggeválggaide ráhkkaneapmái. 

Sámeguovllu gielddaide sierra doarjagat sámegielat bálvalusaid várás

Ruhtadoalloministeriia budjeahttaevttohusas jahkái 2018 lea várrejuvvon ain 480 000 euro sámeguovllu gielddaide sámegielat sosiála- ja dearvvasvuođabálvalusaid ollašuhttimii. Geavahusas lea seammá veardde go dán jagi.

Sámeguovllu gielddat fidnejit vel sierra lassioasi stáhta budjeahtas. Doarjaga fidne gieldda olmmošlogu vuođul, badjelaš 2600 euro juohke gieldalačča nammii. Dat lea 18 euro eanet go dán jagi budjeahtas. Olles doarjjasupmi lea ná 3,553 miljon euro.

Divvojuvvon diibmu 16.20: Sámegielat oahppaávdnasiid buvttadeami stáhtadoarjja Sámediggái bissu jagis 2018 ain 500 000 euros.

Varrasamosat: Sápmi

Váldoođđasat

Varrasamosat

Muualla Yle.fi:ssä