Sápmi |

Suopma ráhkkana ruoššaluosaid čuovvovaš bárrui – eana- ja meahccedoalloministeriija Hakaste: "Dákkár dili ii oktage hálit"

Laskan ruoššaluossanálli bidjá áššedovdiid smiehttat garrasit doaibmabijuid nu Suomas go Norggasge. Eana- ja meahccedoalloministeriija ráđđádalli virgeolmmoš Tapio Hakaste lohká, ahte čuovvovaš doaimmaid plánemii lea áigi sullii jahki.

Tapio Hakaste
– Lean čuvvon dán dili hui fuolas ja váivvesge mielain, ráđđádalli virgeolmmoš Tapio Hakaste dadjá, go sáhka lea ruoššaluosaid laskamis Deanu čázadagas. Govva: Vesa Toppari / Yle

Suoma eana- ja meahccedoalloministeriija lea fuolas ruoššaluossanáli laskamis Deanu čázadagas. Ministeriija leage ráhkkaneame čuovvovaš ruoššaluosaid bárrui, mii lea vuordimis árvalusaid mielde guovtti jagi geahčen.

Ministeriijas eai goit leat vel makkárge konkreahta doaibmaplánat ruoššaluosa eastadeapmái, dadjá ráđđádalli virgealmmái Tapio Hakaste. Konkreahta doaibmabijuid lea sullii jahki áigi válmmaštallat ja plánet, oaivvilda Hakaste.

– Mii smiehttat dan geahččanguovllus, ahte mii livčče jierpmálaš ja fámolaš, Hakaste čilge.

Ruoššaluosaid vuostá áigot dáistalit ovttasbarggus Norggain ja Ruoššain. Ovdamearkka dihte Norgga ráđđehus áigu bidjat 15,3 miljon Norgga ruvnno nappo váile beannot miljon euro ruoššaluosaid eastadeapmái.

"Ruoššaluosaid eastadeapmi sáhttá šaddat bistevaš doaibman boahttevuođas"

Dál ministeriija galgáge smiehttat, makkár doaimmaiguin lea fápmu ruoššaluosa vuostá ja nuppe dáfus mat eai goittotge leat váralaččat Atlanta-lussii. Ovdalaš doaimmat eará guovlluin leat oahppun, čilge Hakaste.

– Ferte gazzat oahpu das, mii leamašan ávkkálaš ja váikkuheaddji, Hakaste dadjá.

Ruoššaluossa lea hui earálágán guolli, go masa guovllus leat hárjánan, muittuha Hakaste. Danin eastadandoaimmaid plánen orru hui hástaleaddji. Eana- ja meahccedoalloministeriijas dili atnet obalohkái fuolastuhttin.

– Lean čuvvon dán dili hui fuolas ja váivves mielain. Dákkár dili oktage ii hálit. Boahttevuođas ruoššaluosaid eastadanbargu sáhttá šaddat eanetge bistevaš doaibman, lohká Hakaste.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä