Sápmi |

Suopmelaš designfitnodat čalmmustahttá roahkadis nissoniid – Jenni Laiti mielde kampánjas

Suopmelaš designmearkkas Uhana Designis lea jođus Girl Gang –kampánja, mainna sii háliidit buktit ovdan dakkár nissoniid, geaid sánit ja dagut leat inspireren sin iežaset barggu. Okta dain nissoniin lea sápmelaš Jenni Laiti.

Jietna: Uhana Design Jenni Laiti
Jietna

Uhana Designa vuovdimis vástideaddji  Anna Pekkanen muitala, ahte Girl Gang –kampánja dárkkuhus lea geavadis ávvudit máŋggabealat nissonvuođa ja addit iežas oasi buotlágán dásseárvvu ovddideapmái, earet eará sohkabeliid gaskasaš dásseárvvu.

– Jurdda das lea dat, ahte juohkehaš sáhttá iežas vugiin buktit ovdan iežas nissonvuođa, ja leat dákkár gievrras persovdna. Ja mii háliidit gievrudit dakkár nissonvuođa, lei dat de mii beare. Ja addit juohkehažžii lobi leat nisson dakkár vugiin, man ieš vásiha buoremus vuohkin.

Pekkanen muitala, ahte sii háliidedje váldit kampánjii dakkár olbmuid, geaid sii ieš gudnejahttet roahkkatvuođas.

– Muhtin láhkái ahte lea leamašan roahkat dahkat áššiid, main sáhttá oažžut moaitámušaid, dahje muđui lea hui váttis bálggis, dahje obanassiige ahte hállá dakkár kampánjii laktaseaddji áššiid bealis. Iige vealttekeahttá dán kampánjii laktaseaddji áššiid bealis, muhto ollašuhttá dakkár iehčanas jurddašanvuogi ja iežas prinsihpaid bealis dáistaleami ja nu ain, muitala Pekkanen.

"Servodatlaš njuolggadusain beroškeahttá"

Pekkanen muitala, ahte Jenni Laiti válljejuvvui kampánjiii mielde, danne go Uhana Designis oidnet, ahte Laiti lea addán ámadeaju sápmelaččaid rivttiid bealis dáistaleapmái.

– Ja várra juste dat, man dihte Jenni, lea dat go son deattuha aivve láhkaásaheami dásis leahkki nuppástusaid ja dahká roahkkadis aktivismma dan ášši ovdii. Namalassii kánske beroškeahttá dakkár servodatlaš njuolggadusain, mat leat ráhkaduvvon earáid eavttuiguin. 

Uhana Design gávnnai Laiti oalle láhkai media bokte.

– Sosiála medias ja ođđasiin, ja maid lea leamašan dás Suohpanterror-joavkkus. Ja dasto leimmet dan vuođul oktavuođas Jennii, joatká Pekkanen.

Anna Pekkanen lei mielde Dearvva-sáddagis 30.6.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä