Sápmi

Supmii boahtti olbmuid stivrejit dál bággotestii maid Gáregasnjárggas – gálvvut besset oalle friija johtit rájá rastá

Kari Guttorm
Kari Guttorm manahii áhččis covid-19-dávdii mannan jagi Govva: Anneli Lappalainen / Yle

Ráját leat áibba dušši dihtii gitta, dadjá fitnodatdoalli Kari Guttorm.

Gáregasnjárggas Suoma ja Norgga rádjá lea ráfálaš, ráji rasttildeaddjit eai olus dihtto. Vuossárgga bohte ođđa rávvagat rájiide Lappi guovlohálddahusdoaimmahagas. Dál galgá Supmii boahtti olbmuid stivret dearvvašvuođadárkkistussii ja koronatestii, nu gohčoduvvon bággotestii. Jus teasttas beahttala, sáhttá rihkkut lága ja sáhkkohallat dahje gártat golmma mánotbadjái giddagassii.

Guktuid bealde rájiid leat rádjebearráigeahččit. Suomas beassá njuolgga Norgii, muhto doppe leat Norgga rádjegohccit vuostáiváldimin ja Norggas boahtti vuostáiváldet Suoma rádjegohccit.

Video: Karigasniemen tulli
Rádjegohccit stivrejit olbmuid rájá alde dearvvašvuođadárkkistussii. Video: Anneli Lappalainen / Yle

Gáregasnjárgalaš fitnodatdoalli Kari Guttorm rasttilda ráji ain duollet dálle go fievrreda gálvvu guorbmebiillain Suomas Norgii dahje Norggas Supmii. Gálvovuojiheami ii guoskka rájiid gidden.

– Rájiid gidden ii guoskka go gálvvuid doalvu dahje buktá Suoma čađa ja doalvu Norgii, čilge Guttorm.

Guttorm joatká, ahte dáppe davvin galggašedje leat obban earálágan mearrádusat go Mátta-Suomas.

– Ráját leat áibba dušši dihtii gitta. Mátta-Suomas eai ádde, man garra dilis mii leat. Mis ii leat bargu, gávppit leat gitta, ii mihkkige. Turisma lea nohkan, visot lea nohkan.

Kari Guttorm mielas davvin galggašedje leat obban earálágan mearrádusat go Mátta-Suomas. Jietna: Anja Kaarret / Yle

Ranttila rasttilda ráji beaivválaččat go fievrreda bohccuid Norgii

Valde Ranttila fievrreda fas Supmii boahtán Norgga bohccuid ráji rastá dávjá máŋgii beaivái Norgii. Ranttila mielas rasttildeapmi lea váttis ja son vuordáge boahtteáiggi. Rádjegohcci attii sutnje báhpára, gos ledje rávvagat nugo gos sáhttá váldit koronateastta.

– Galhan dat váttis lea go ferte ortnet buot báhpiriid. Gal oččošii leat báikki olbmuide álkit.

Valde Ranttila, Karigasniemi
Valde Ranttila fievrreda beaivválaččat Supmii gárgidan bohccuid Norgii Govva: Anneli Lappalainen / Yle

Valde Ranttila mielas rájá rasttildeapmi oččošii leat báikki olbmuide álkit. Jietna: Anja Kaarret / Yle

Korona fallehii sakka bearraša

Kari Guttorm lea buohcan covid-19-dávdda mannan jagi ja dan olis son lea fitnan koronateasttain dávjá. Sus dávda ii nuge dihtton, muhto su bearašlahtut buhce vearrábut. Son muitala, ahte eallinguoimmis buozai vihtta vahku ja áhččis son manahii dávdii jahkemolsašumis. Dávda lei njommon bearrašii skábmamánus.

Guttorm muitala, ahte son lei dalle beannot mánu karantenas iige vuodján biillaid. Dál son lea buorránan ja láve leat várrugas jođedettiin olbmuid siste.

Beaivvi ságaid jaYle Ođđasiid Sámis sáhtát maid guldalit Yle Areenas.

Varrasamosat

Muualla Yle.fi:ssä