Sápmi |

Sus leat niegut dáidaga suorggis – Ante čuojaha gitára iežas vugiin ja maiddái tevdne

Ante Jalvela gávnnai perkussionisttalaš čuojahanvuogi muhtin jagi dassái.

Video: Ante Jalvela čuojaha.
Gaskasuopmelaš sámebojá Ante Jalvela čuojaha gitára iežas vugiin, dát lea perkussionisttalaš čuojahanvuohki. Video: Anneli Lappalainen / Yle

Gaskasuopmelaš dálus gitára čuodjá juohke eahket, go 21-jahkásaš Ante Jalvela hárjehallá čuojaheami. Sus lea perkussionisttalaš čuojahanvuohki.

Dat oaivvilda, ahte son seammás go čuojaha gitárra, časká alcces távtta doaškkumin, spoahkuheamin, skoalkaladdamin ja nu ain gitára muorraosiid.

Go son dolká čuojaheamis, de dohppe liánttaid ja tevdnegoahtá. Sus lea niehkun ovdánit nu čuojaheamis go tevdnemis. Dál vel beaivvit gollet barggus dáiddagávppis Jyväskyläs Gaska-Suomas.

Musihkas ohcá vel bálgás

Ante Jalvela čuojaha.
Perkussionisttalaš čuojahanvuohki lea iežaslágan dáiddačehppodat. Govva: Anneli Lappalainen / Yle

Ante Jalvela muitala, ahte dán perkussionisttalaš čuojahanvuogi son gávnnai muhtin jagi dassái. Son lohká diehtit, ahte dát ii leat álkes musihkkasuorgi mainna ovdánit. Dán áigái eambo geasuha dábálaš viestarmáilmmi musihka.

– Áiggi mielde mun lean álggahan maid lávlagiid čállima, ja trubaduura-vugiin lávlut ja akusttalaš gitárain čuojahit suopmelaš folk-musihka.

Sámemusihkas son ii leat vel nu siste, muhto sus leat dihto artisttat geaid čuovvu. Ovdamearkan su vilbealli Niillas Holmberg lea okta, gean son viššalit čuovvu ja vel soames earát.

– Mun čuovun Solju-joavkku, Hilda Länsman, Niillas Holmberg ja Arvvas. Vilda-duo lea ođđa joavku maid lean čuovvugoahtán.

Sámemusihka goit lea báhcán sus vel viehka guhkás, go sonhan maid ássá guhkkin eret sámeguovllus, Laukaa gávpogis Gaska-Suomas. Muhtin beaivvi son lohká oahpásmuvvat dasage dárkilabbot, vuosttamužžan goit leat vuordagat ovdánit iežas musihkkasuorggis.

– Livčče somá beassat maid dasa sisa. Muhto juos vuos beasašii musihkkasuorggis ovddusguvlui, dat lea munnje dehálaš oahppat dán suorggis eambo, dadjá Ante Jalvela.

Máttut Sámis oidnojit govain

Ante Jalvela
Luondu oidno Ante Jalvela tevnnegiin, maiddái sámi luondu. Govva: Anneli Lappalainen / Yle

Nuorra albmá máttut leat Vuolle-Jalvvis láhka Njuorggán gili Ohcejoga gielddas. Su rivttes goargu livččege Guttorm, muhto Jalvela orui álkit namma suopmelaš birrasis. Dange goit šaddá máŋgii čilget mo dat čállojuvvo, go dat lea suomagielagii amas. Veagal figget čállit nama hámis Jalava dahje Jaleva.

Go de dolká čuojaheapmái, son dohppe liánttaid gihtii ja tevdnegoahtá. Sus lea maid das vehá iežaslágan vuohki hui dárkilit sárgut smávva detáljaid. Govvii lea beassan maid gáddebovdna Vuolle-Jálvvis, su eatni Mari Jalvela ruoktobáikkis.

Son lea goit nuorra ja ohcá vel bálgás gosa dat ihkinassii dolvvoš. Sus leat goit niegut maid govvadáidaga suorggis.

– Mu mielas dáiddasuorggis maid livčče somá bargat, oaidnit leš, juoganulágan dietnasiin goit sáhtašii boahttevuođas plánet, oaivvilda nuorra almmái.

Smávva ságastallanbottu áigge maid Yle Sámi doaimmaheaddjis riegáda govva. Dákkár live-sárgun maid lea somá, muhto Ante Jalvela áiggošii maid dán suorggis eambo oahpu gazzat.

Boahttevuohta de čájeha guđe guvlui bálgát dolvot su dáiddalaš figgamušain.

Ante Jalvela sárgu.
Ságastallanbottoža áigge govva riegáda maid doaimmaheaddjis, Govva: Anneli Lappalainen / Yle

Eanet áššis vuossárgga Yle Ođđasat -sáddagis Yle Tv 1:žis diibmu 16.45

Varrasamosat: Sápmi

Váldoođđasat

Varrasamosat

Muualla Yle.fi:ssä