Sápmi |

Suvi Kustula bargá bohccuiguin olles beaivve bargun – son ja eará nissonat muitalit ođđa girjjis sin hástalusain ja lihkosmuvvamiin boazodoalus

"Naiset jotka valitsivat porot" girji muitala nissoniin boazodoalus. Suvi Kustula ávžžuha buot nissoniid, geat leat beroštuvvan dan barggus, goittotge geahččalit bargat boazodoalus.

Suvi Kustula
Badjealbmá Suvi Kustula jurdagiid sáhttá lohkat gieskat almmustuvvan girjjis. Sus lei jurddan lohkat nuppi ámmáha, muhto dál bargá ollesbeaivválaš badjealmmájin. Govva: Päivi Näyhä-Laakko

Guldal Suvi Kustula jurdagiid áššis. Jearahallan lea suomagillii. Jietna: Sáárá Seipiharju / Yle

Avvillaš badjealmmái Suvi Kustulai lei álo čielggas, ahte háliida bargat boazodoalus ovdamearkan oalgebargun. Dál son lea goittot ollesbeaivválaš badjeolmmoš.

– Mus lei álggus jurddan lohkat maiddái nuppi ámmáha, muhto dalle fuomášin, ahte ii das šatta mihkkige. Mun finastin Roavenjárggas beannot vahku skuvllas ja smihtten ahte ii, ferten vuolgit ruovttoluotta davás boazoskuvlii, son reašká.

Suvi Kustula Avvila bálgosis lea okta sis, gean jurdagiid sáhttá lohkat gieskat almmustuvvan girjjis Naiset jotka valitsivat porot (sá. Nissonat geat válljejedje bohccuid). Girječálli bođii Avvilii Kustula ruoktot jearahallat su. Muhto ovdal go sáhtte bargagoahtit, galggai Kustula oahpahit girječállái boazodoalu sániid vai son diehtá mas lea sáhka, go Kustula hállá vaikkoba áldduin.

Girječálli Maria Paldanius guorahallá girjjistis nissoniid sajádaga, bargguid ja rolla boazodoalus. Nissonat, geat barget boazodoalus, muitalit makkár hástalusat ja lihkosmuvvamat sis leamašan. Girjjis leat mielde oktiibuot 18 nissona geat barget bohccuiguin.

Kustula ii leat ieš fuomášan eahpedásseárvvu boazodoalus.

– Galhan dan iežas saji galgá ohcat, muhto gal dat dalle loahppa loahpas jurddašit, ahte sáhttet nissonat maid leat, go doarvái bargá.

Kustula: Badjealbmá bargu gáibida áŋgirvuođa

Suvi Kustula oaidná, ahte badjealbmá bargu gáibida áŋgirvuođa, sohkabealis beroškeahttá.

– Leahan dat fysalaččat garra bargu. Vaikko livččii 30 buolašgráda, de ferte vuolgit, son čilge.

Leago Suvi Kustula dasto badjealmmái, badjenisu, boazodoalli vai mii?

– Na gal dat namahus sihkkarit lea badjealmmái (su. poromies). Sáhtášii dat dieđusge leat maid boazodoalli, muhto badjenisu namma ii orro vuogas, son árvala.

Kustula lea ieš lohkan masá oppa girjji ja su mielas doppe leat ollu oahpes áššit, muhto juohke nissona máinnas lea monu maid earálágan. Nuorra nissoniidda, geat smihttet boazodoalli ámmáha, son sádde dákkár dearvvuođaid:

– Jos it leat aivve vissis, de gánnáha goittot geahččalit ja dallehan diehtá, leago dat du hommá vai ii.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä