Sápmi |

Suvi West Eatnameamet vuittii Ruonáeatnama NIFF:s buoremus dokumentára bálkkašumi

Eatnameamet gilvala dán vahkkus Ruoŧas Nordisk Panorama -filbmafestiválas buoremus davviriikalaš dokumentárafilmma bálkkašumis.

Suvi West
Bagadalli Suvi West mielas bálkkašumit eai leat olles eallin. Son goit atná árvvus, ahte Eatnameamet-filbma lea evttohassan buoremus davviriikalaš dokumentárafilbman. Govva: Vesa Toppari / Yle

Bagadalli Suvi West dokumentára Eatnameamet lea vuoitán Ruonáeatnamis Nuuk riikkaidgaskasaš filbmafestiválas dahje NIFF:s buoremus dokumentára bálkkašumi.

Festivála loahpahanseremoniija lea oaidninláhkai Nuuk riikkaidgaskasaš filbmafestivála Facebook -siidduin. Seremoniijas West giitá video bokte olles bargojoavkku beales buot duopmáriid ja sin, geat leat geahččan filmma. Son maid muitala, ahte filmma leat dahkan lagabui guhtta jagi ja ahte dat ii leat álot leamašan álki.

West šaddá dál vuordit gealdagasain gaskavahku rádjai, go dalle čielgá man láhkái filbma birge Nordisk Panorama -filbmafestiválas Malmös Ruoŧas. Eatnameamet lea doppe evttohassan buoremus davviriikalaš dokumentárafilbman.

Bagadalli mielas bálkkašumit eai leat olles eallin, muhto West atná árvvus, go filbma lea mielde gilvvus.

– Dat ii mearkkaš dien láhkái maidige, go dat lea goittotge subjektiivvalaš oaidnu. Muhto mun anán árvvus dan, ahte doppe leat leamašan olbmot, geat leat atnán dán filmma dan dási filbman, ahte jurddašit dat sáhtašii leat okta Davviriikkaid buoremus dokumentárafilmmain. Mii leat hui giitevaččat dáid olbmuide geat leat dan dahkan ja válljen, dadjá Suvi West.

Eatnameamet – Min jaskes dáistaleapmi muitala Suoma stáhta sámepolitihkas ja sápmelaččaid dáistaleamis iežaset álbmoga ja kultuvrra bealis. Filbma lea árat vuoitán earret eará Tampere filbmafestiválas gehččiid bálkkašumi ja Girku mediasäätiö bálkkašumi.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä