Sápmi |

Suvi West filbma Suoma stáhta sámepolitihkas ja sámiid jaskes dáistaleames vuosttašeahkedis DocPoint-festiválas

Eatnameamet – Min jaskes dáistaleapmi čájehuvvo Helssega dokumentáraealligovvafestivála DocPointis, mii ordnejuvvo neahtas 29.1.–7.2.2021.

Eatnameamet – Min jaskes dáistaleapmi, Suvi West, Yle Sápmi,
Bagadalli Suvi West bargoguimmiinis čuovui dokumentárafilmma várás Sámedikki čoahkkima. Dan oktavuođas son báddii jearahallama, mas Yle Sámi doaimmaheaddji Susanna Guttorm ja mediadoaimmaheaddji Vesa Toppari jearahallaba sámediggeáirras Asko Länsmana. Govva: Eatnameamet – Min jaskes dáistaleapmi / Preassagovva

Bagadalli Suvi West Eatnameamet – Min jaskes dáistaleapmi -filmma vuosttašeahket lea Helssega dokumentárafilbmafestivála DocPointis. Filbmafestivála lea dán háve riikaviidosaš neahttafestivála, mii ordnejuvvo 29.1.–7.2.2021. Bileahtain dan sáhttá čuovvut gos beare neahttaoktavuođaid bokte.

Eatnameamet – Min jaskes dáistaleapmi čájehuvvo gilvoráiddus. Filbma muitala Suoma stáhta sámepolitihkas ja sápmelaččaid dáistaleamis iežaset álbmoga ja kultuvrra bealis. Filmmas lea almmustahtton filbmaseakti, mii lea geahččanláhkái YouTubes.

Eatnameamet – Min jaskes dáistaleapmi / Preassagovva, Suvi West, Docpoint
Bagadalli Suvi West dokumentárafilbma Eatnameamet – Min jaskes dáistaleapmi muitala Suoma stáhta sámepolitihkas. Govva: Eatnameamet – Min jaskes dáistaleapmi

Filbmafestivála dieđáhusa mielde Suvi West filbma lea modeardna dokumentáralaš muitalus, mas sápmelaččat ieža muitalit vásáhusaideaset.

Govven earret eará Sámedikki čoahkkimiin

Bagadalli Suvi West bargoguimmiinis lea govven ovdamearkka dihte Sámedikki čoahkkimiid. Diibmá Sámedikki ortniiduvvančoahkkimis šattai ságastallan sensureremis ja jávohuhttimis, go muhtin sámediggeáirasat eai háliidan, ahte dokumentáradahkkit govvešedje čoahkkima dokumentáraid várás.

Maiddái su vuosttaš guhkes filbma Sparrooabbán čájehuvvui jagi 2016 DocPoint-festiválas ja dat vuittii geahččibálkkašumi.

Dán jagi DocPoint-festivála áigge čájehuvvo oktiibuot 71 dokumentárafilmma, mat laktásit máŋgga láhkái áigeguovdilis dáhpáhusaide miehtá máilmmi. Dán háve filmmain 57 proseantta leat bagadallan nissonat juogo okto dahje oassin bargojoavkkus.

Beaiváduvvon 15.1.2021 dii. 9.06: Lasihuvvon filbmaseavtti liŋka.

Divvojuvvon 14.1.2021 dii. 14.51: Bajilčála beaiváduvvon ja festivála dieđut dárkilmahttojuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä