Sápmi |

SVT: Ruoŧa stáhta ruvkefitnodat ohcá málmma gasku Girona guovddáža

Ruvkefitnodat LKAB lea álggahan iskkusbohkamiid Girona gávpogis. Mihttomearrin lea ollet duhát mehterii ovdal čavčča. 

LKAB koeporaaminen Kiiruna
Ruoŧa stáhta ruvkefitnodat LKAB oaidná, ahte fitnodagas lea čuvges boahtteáigi, jos gávdnet málmmaid duhát mehtera čiekŋalasas. Govva: SVT

Dábálaččat ruvkefitnodagat dahket iskkusbohkamiid meahcis dahje lahka ruvkke, muhto dál lea Ruoŧa stáhta ruvkefitnodat LKAB álggahan iskkusbohkamiid gasku Girona gávpoga.

LKAB álggahii bohkamiid álgovahkus Norrmalmsparkenis, Girona gávpoga guovddážis, muitala SVT.

Mihttomearrin lea ollet duhát mehterii ovdal čavčča. LKAB sávvá, ahte dalle bovrrat leat čáhppadat málmmain ja jos nu lea, de ruvkefitnodat oaivvilda fitnodagas leat čuvges boahtteáigi.

– Dat váldá olles geasi, ovdalgo mii diehtit mii gávdno duhát mehtera čiekŋalasas, dadjá LKAB vástideaddji geologa Laura Lauri.

Ožžot vejolaččat vástádusa boares gažaldahkii

Iskkusbohkamiid dahket Gironvári ja Luossavári gaskkas, gos jáhkket, ahte málmmat sáhttet boahtit oktii.

Sávaldat lea oažžut vástádusa gažaldahkii, gullojitgo dát málmmat oktii. Dán gažaldaga leat smiehttan jo 1900-logu álggus, ja dán čavčča dasa vejolaččat ožžot vástádusa

Dát lea vuosttaš geardi, go LKAB bohká gasku guovddáža. Dál fertejitge veahá eará láhkai jurddahit ja bargat, dadjá fitnodaga iskkusbohkanteknihkkár Jonny Olofsson.

– Ferte doallat jietnadásiid, ii oaččo luoitit olggos ilá olu bohkkončázi, ja galgá fuolahit ahte biras bissu čorgadin.

Giron lea áibbas ruvkke báldii huksejuvvon gávpot Davvi-Ruoŧas. Dan leat plánemin sirdit amas gávpot gahččat eananvuloš ruvkke dihtii.

Varrasamosat: Sápmi

Váldoođđasat

Varrasamosat

Muualla Yle.fi:ssä