Sápmi |

SVT: Standing Rock Sioux čearda bivdá veahkki ON olmmošvuoigatvuođaráđis

Standing Rock Sioux čeardda njunuš David Archambault II bivdá ON olmmošvuoigatvuođaráđis ja buot ON lahttoriikkain doarjjaga sin dáistaleapmái oljofitnodaga vuostá.

David Archambault II
Govva: David Rydenfalk / Sameradion & SVT Sápmi

Standing Rock Sioux čeardda njunuš David Archambault II dáhttu máilmmi servvodaga ja ON olmmošvuoigatvuođaráđi doarjut áŋgirdeami bissehan dihte fitnodaga huksemis stuorra oljofievrridanbohcci North Dakota čađa.

– Oljofitnodat ja USA ráđđehus eai leat bastán suddjet min suverena vuoigatvuođaid, dadjá David Archambault II Ovttastuvvan nášuvnnaid olmmošvuoigatvuođaráđđái go eamiálbmogiid vuoigatvuođat ledje áššelisttus.

Oljofitnodat áitá bassi báikkiid

Son muitala oljofievrridanbohcci Dakota Access Pipeline huksemis, mii joatkašuvva Standing Rock guovllus. Bohccis, mii galgá huksejuvvot sin váldočáhcegáldu vuolil. Fitnodagas mii dihtomielalaččat lea jávistan bassi báikkiid ja máttuid hávddiid guoivunmášeniiguin.

– Fitnodat lea maiddái geavahan fallehanbeatnagiid vahágahttin dihte olmbuid geat leat geahččalan gáhttet čázi ja bassi báikkiid. Dupmen buot veahkaválddi, maiddái beatnagiid geavaheami, dadjá Archambault ONii.

Čearda bivdá ON lahttoriikkaid reageret

David Archambault II bivdá olmmošvuoigatvuođaráđi ja buot ON lahttoriikkaid dupmet Standing Rock bassi báikkiid bilideami. Ávžžuha vel buohkaid bissehit jiehtanasbohcci Dakota Access Pipeline huksema ja gáhttet birrasa, olbmuid boahtteáiggi, sin kultuvrra ja sin eallinvuogi.

– Deháleamos lea diktit máilmmi diehtit mii sin guovllus dáhpáhuvvá, maid riikka ráđđehus bargá.

Maid sávat máilmmiservvodagas?

– Máilmmiservvodahkii gullet maiddái eamiálbmogat. Go muitalit iežamet muitalusaid soaitit sáhttit veahkehit nubbi nuppi ja ovttas vuostálasttit vearrivuođaid dan vuostá mii lea dehálaš, mas lea midjiide mearkkašupmi, eatnamat, čáhci, eallit, eallin, dadjá David Archambault II.

Sámeráđđi doarju čeardda

Jo mánu áigi sáddii Sámeráđđi doarjjareivve Standing rock olbmuide.

Sámiráđi ságadoalli Áile Jávo Ovttastuvvan nášuvnnaid álgoálbmotforuma oktavuođas 2014.
Govva: Anna Sunna / SR Sámi Radio

– Sávan dieđusge ahte riikkaidgaskasaš beroštupmi áššái váikkuha nu ahte sihke USA eiseválddit, muhto maiddái fitnodat boahtá eará, buoret jurdagiidda, dadjá Sámeráđi ságadoalli Áile Jávo.

Jáhkatgo duođas, ahte sáhttá ná váikkuhit ahte dilli buorrána?

– Leat ovdal oidnán, ahte stuorra deaddu sosiála mediain, erenoamážit riikkaidgaskasaččat, lea nie váikkuhan, nu ahte ii leat go sávvat ahte nu sáhttá mannat dánge háve, dadjá Jávo.

Varrasamosat: Sápmi

Váldoođđasat

Varrasamosat

Muualla Yle.fi:ssä