Säämi |

Tääl lii ain máhđulâšvuotâ uuccâđ Giellagas-instituutin luuhâđ anarâškielâ

Anarâškielâ uáppoid puáhtá luuhâđ meid pargo ohtâvuođâst, iätá Oulu ollâopâttuv anarâškielâ máttáátteijee Mervi Skopets.

Jietna: Mervi Skopets
Jietna
Ollâopâttuv anarâškielâ máttááttijjee Mervi Skopets.

Tääl lii máđhulâsvuotâ uuccâđ sierâ oppâvuoigâdvuođâ anarâškielâ uáppoid Oulu ollâopâttuv Giellagas-instituutin porgemáánu 15. peeivi räi.

Sierâ oppâvuoigâdvuotâ meerhâš tom, et juáháš puáhtá uuccâđ luuhâđ anarâškielâ Oulu ollâopâttuv Giellagâs-instituutin, kiäst ij lah uáppuvuoigâdvuotâ Suomâst ollâopâttuvâst teikkâ áámmátollâškovlâst.

Tagareh ulmuuh, kiäin lii maggaargin tuđhos Oulu ollâopâttuvâst, pyehtih uuccâđ tutkos keevâttittem vuoigâdvuođâ. Mudoi täst iä lah magarehgin ereslágáneh vátámâšah, muštâl Oulu ollâopâttuv anarâškielâ máttáátteijjee Mervi Skopets.

– Puáhtá uuccâđ luuhâđ vuáđu-uápuid, teikkâ amnâsuápuid, jos vuáđu-uápuh láá luhhum ovdâmerkkân Anarist, seelvât Skopets.

Uáppee ij lah olesäigiuáppee

Ohtâ iäru sierâ oppâvuoigâdvuođâst táválii oppâ vuoigâdvuotân lii, et uáppee ij lah ubâpiäiválâš uáppee já sust iä lah ubâ ääigi uáppee vuoigâdvuođah. Ige taarbâš čuággiđ tiätumere oppâčuággáid ivveest.

– Puáhtá luuhâđ meid pargo ohtâvuođâst, ko kuittâg maaŋgah anarâš kuursah láá ehidist já viermist, ij taarbâš leđe ain Oulustkin, iätá Skopets.

Sierâ oppâvuoigâdvuođâst lii kyevti ihán, ige täst pyevti toohâđ tutkos.

Talle jos lii jo luuhâm anarâškielâ vuáđu-uápuid já lii jo kandidaat tuđhos, teikkâ vyeleeb áámmátškovlâtuđhos, te puáhtá uuccâđ luuhâđ anarâškielâ Oulu ollâopâttâhân tuđhosuáppen. Tom puáhtá uuccâđ sierâ, ij taarbâš moonnâđ siisâ peessâm iskosân.

– Taan räi láá puohah occeeh peessâm siisâ luuhâđ anarâškielâ, kiäh láá halidâm. Ige taat lah máksám táássáš maiden, iätá Skopets.

Uuccâm ravvuuh já luámáttuvah kávnojeh Oulu ollâopâttuv siijđoin.

Varrasamosat: Säämi

Váldoođđasat

Varrasamosat

Muualla Yle.fi:ssä