Säämi

Tääl lii kuobârulmui tuoivâčohčâ, meecih láá tievâ kuobbârijn – taat movtáskijd puurrâđ, nuurrâđ já ivniđ veik laaigijd

Kirsi Ukkonen
Kirsi Ukkonen illood ko tääl lii nuuvt šiev kuobârčohčâ. Govva: Anja Kaarret / Yle

Kirsi Ukkonen ij taarbâš moonnâđ kuhás olgouuvsâst ko kuobbâreh kávnojeh. Irma Majander lii tääl iiloost ko viijmâg-uv piäsá vuoššâđ kuobârliemâ.

Moonnâm ive kuobârdiš ive maŋa taat čohčâ lii lamaš kuobârulmuid tuoivâčohčâ. Kuobbâreh láá ennuv.

Meccihaldâttâs eromâš vuávájee já puásuitáálu eemeed Kirsi Ukkonen illood taan čuovâst. Suu perrust peeli lijkkoo puurrâđ kuobbârijd, iššeed mielâst taah láá poccuu purrâmušah.

Sun aalgij lijkkuđ kuobbârijn, ko poođij anarân Sämimáttááttâs kuávdášân škovlân. Talle tobbeen koolgâi čođâldittiđ kuobbârnorree koortâ. Ohtâ suu hersku kuobbârijn lii kuolbâruávsku. Šiev kuobâr ihe lii uážžum suu movtáskittiđ uđđâ aašijn.

– Jis mun irâttiččim mälistiđ etikkakuobbârijd, jiem lah kuássin jieš taid mälistâm, mut lam uážžum skeŋkkân já toh lijjii pyereh, arvâl Ukkonen.

hapero
Smiäruhijn lii älkkee rähtiđ purrâmuš já meid toh láá tääl ennuv. Govva: Anja Kaarret / Yle

Smiäruheh láá nubbe herskušlaajâ, mooa Kirsi lijkkoo. Já toh láá meid ennuv. Toin lii timmâ smakkâ já taid ij taarbâš mahten kieđâvuššâđ. Motomijn toin lii piškeris smakkâ, mut toid puáhtá njuohčâmijn smakkiistiđ.

– Smiäruheh láá áinooh, maid tuástá smakkiđ njalmijn, rávvee Ukkonen.

Suomâst láá suullân muáddituhháát kuobâršlaajâd, moin 500 láá purâtteijeeh. Tave kuávlust puoh taatih láá purâtteijeeh já ton tááhust tain lii-uv pyeri algâttiđ.

Taggaar kuobbârân ij koolgâ kuoskâđ, mon ij tuubdâ

Kirsi Ukkonen lii meid čođâttâm kyevdi kuobbârist tutkos, et uážžu taid čuággiđ vyebdim várás. Kuobbârijd ij kuittâg lah pyeri puurrâđ, jos ij lah aaibâs vises lii-uv tot purâtteijee vâi ij. Ohtâ mielâkiddiivâš kuobâr ličij ruopsispoovij seitikki.

– Tot lii purâtteijee já lam tom ohtii puurrâm. Ko lâi äššitobdee mieldi, te tuostim tom smakkiđ, mut ko tot muštoot čuhârkkâseitikki, te jiem tuostâ ohtuu tom väldiđ, iätá Ukkonen.

Kirsi Ukkonen
Kirsi Ukkonen lyeddee taati. Tavekuávlust puoh taatih láá purâtteijeeh. Govva: Anja Kaarret / Yle

Taatih láá taan kuávlust toh puoh torvolumoseh kuobbâreh, moin lii älkkee algâttiđ. Tavveen ij šoodâ ohtâkin taggaar tatti mii ličij mirhâlâš.

Video: sienet
Kuobbârid puáhtá älkkest steikkiistij purrâmušân.

Kuobbâreh láá meid šiev ivnimamnâseh

Tovle ulmuuh meid kuškâdii kuobbârijd poccuid täälvi várás. Onnáá peeivi kietâtuájáreh lijkkojeh ivniđ laaigijd kuobbârijn.

langat
Irma Majaner šadoikin ivnejum ullolääigih. Govva: Anja Kaarret / Yle

Aanaar Rivdulist ässee tuájár Irma Majander lii tääl iiloost, ko viijmâg-uv piäsá vuoššâđ kuobârliemâ. Ivnimliemâ vuoššâm tábáhtuvá ain olgon mirhâi tet.

– Lam nuuvt moovtâ, ko moonnâm čohčâ lâi nuuvt hyenes koobâščohčâ já tääl toh láá veik mon ennuv, iätá Majander.

Irma Majander
Irma Majander vuoššâmin kuobbârijn ivnimliemâ. Govva: Anja Kaarret / Yle

Majander muštâl meid, et talle ko olmooš moovtâs šadoiguin ivniđ, te taat hommá váldá fárusis aaibâs tuođâs. Lääigih láá eenâb ko maid kiergân kođđeeđ.

Suu mielâ kuobâr taan ivnimhommáást lii kuumpityevli (sudenkääpä). Taat lii härvinâš Suomâst, mut Rivdul jeevilkuolbânijn tot šadda. Nubbe kuobâršlaajâ, maid sun kiävttá ivniimist, láá seitikkih.

Irma Majander
Irma Majander lii kođđáám tikkurijd šadoiguin ivnejum ullolaaigijn. Govva: Anja Kaarret / Yle

– Pyeremus taan hommáást lii tot, et ij kuássin tieđe maggaar ivne tast loppâloopâst šadda, puoh ivneh láá muččâdeh, muštâl Majander.

Varrasamosat

Muualla Yle.fi:ssä