Säämi

Tääl lii saahâ ustevijn: kielâpiervâl párnááh já ovdâškovlâliih halidij juhlođ ustevpeeivi oovdâst teivâdmáin meecist

Video: kielipesä lapset
Kielâpiervâl juávkku adelij nubijdis koortâid já sierâdii oovdâst.

Kuáhtáámist lâi koortij adelem nubijdis já riijâ sierâdem oovdâst.

Aanaar anarâškielâ kielâpiervâlij juávkku halidij leđe oovdâst anarâškielâlij ovdâškovlâlijguin ustevpeeivi kunnen. Sij soppii teivâm miäcán suullân pelimuudon škoovlâ já kielâpiervâl kooskân. Kielâpiervâl piervâljođetteijee Ritva Kangasniemi muštâ,l et sij iä lah ennuv škovlâlijguin oovdâst, veik láá-uv aldaluvâi.

Párnáid lii hitruu teivâđ nuubijd já sierâdiđ oovdâst. Taan tove teivâdmist sijjân ij lamaš uárnejum eres ohjelm ko koortij adelem nubijdis.

– Párnááh uážžuh riijâ sierâdiđ muottust já leđe oovdâst, muštâl Kangasniemi.

Ritva Kangasniemi
Piervâl jođetteijee Ritva Kangasniemi čáittá ovdâškovlâlii rähtim koorti. Govva: Anja Kaarret / Yle

Juáháš lii tom mielâ, et usteveh láá tergâdeh

Kielâpiervâlijn já škoovlâst lii saahâ tom ääšáit mii lii äigikyevdil. Tääl lii saahâ ustevijn. Juáháš lii tom mielâst, et usteveh láá teháliih.

– Must láá aainâs-uv paijeel čyeti, muštâl kuuđâ-hásâš Sampo Sieppi.

Puohâi čyeđe ustev noomâ Sampo ij mušte, mut siiguin sun lii sierâdâm já toh láá talle suu usteveh.

Kuldâl kielâpiervâl já ovdâškolvâlij saavâid ustevijn täst.

koululaiset
Anarâškielâ ovdâškovlâlii máttáátteijee já párnááh totkeh ustevpeivikoortâ mon ožžuu kielâpiervâlist. Govva: Anja Kaarret / Yle

Anarâškielâ ovdâškoovlâ máttáátteijee Minna Lampinen vuolgij mielâstis ustevpeeivi teivâdmân, ko uážui kielâpiervâlist povdiittâs.

– Mielâst vuolgijn, párnááh láá-uv ahevuččâm kielâpiervâl skipárijd, muštâl Lampinen.

Lampinen siämmást tuáivu, et sij orniiččij eenâb ohtsijd teivâdmijd veikkâ maggaarkin eromâš suujâid ij ličij. Riijâ oovdâst orroom tuše tego taan tove.

Kuldâl taan oho Binna Bánna täst.

Varrasamosat

Muualla Yle.fi:ssä