Säämi |

Tääl ohtâ peivi, tovle lijjii markkâneh – "Mudoi moonâi pyereest, mutâ ko uáđđiđ ij peessâm"

Tovle oovtâ oho kesimarkkâneh puohtii oohtân anarâš ulmuid. Talle ij lamaš asto uáđđiđ.

Jouni Saijets
Govva: Sáárá Seipiharju / Yle

Moonnâm oho pasepeeivi uárnejii Anarist anarâšâi kirkkopase. Eeva SeurujärviJouni Saijets lává pärnivuođâ rääjist uásálistám Aanaar markkânijd.

Eeva Seurujärvi muštá maht sun pärnin lâi Aanaar sämikirhoost.

– Nuuvt pärni val lijjim, ete oođđim eeni já eeji askeest já tom alttartaavvâl keččim ko tot lâi nuuvt fiijnes, muštâl Seurujärvi.

Markkânijn lâi maaŋgâpiälálâš ohjelm já jis mälistem ij kiäsuttâm te lijjii meid eres muulsâiävtuh.

– Nuorâin lijjii tánssám homáh, mutâ jiem mun tobbeen kuássin iällám, iätá Seurujärvi.

Seurujärvi ij osko, ete taan ääigi ulmuuh puáđáččij ubâ ookon markkânijd.

– Taan ääigi ulmuin ij lah asto, tom äigi lâi ulmuin asto. Ko toh pottii te vuossaargâ eskin vuolgii maasâd ko kukken pottii, te vuordii, ete käävpih lekkâsij vuossaargâ, te ostii val tävirijd ovdil ko vuolgii.

Seurujärvi muštâl, ete tovle ulmuuh pottii siämmáá suujâst markkânijd ko maid taan ääigi: piäsá uáiniđ uápisulmuid.

– Ij-uv sun maŋgâ paarâ-uv tom ääigi kavnum, povvust Seurujärvi.

Aanaar kirkko
Anarâšâi kirkkopase lâi pasepeeivi Aanaar sämikirhoost. Govva: Eljas Niskanen / Yle Sápmi

Jouni Saijets muštâl, ete taan ääigi tábáhtus lii aaibâs ereslágán ko tovle.

– Tallehân pottii moottorkárbáigijn teehin, ennuv lijjii ulmuuh. Ennuv vuolgij Pärttihist kárbáh.

– Motoráin ubâ peivi moonâi puáttiđ talle. Tothân lâi šiettuus mätki, muštâl Saijets.

Suu muštoi mieldi markkâneh pištii oho.

– Mun muštám ko pottii pááikán, ete maht markkâneh monnii? Mudoi moonâi pyereest, mutâ ko uáđđiđ ij peesâm! Muštâl Saijets.

Sun muštâl, ete tulâstâllâmsaje lâi riddoost já tobbeen ulmuuh vuoššii käähvi já kuolijd já meiddei lavluu. Pasepeeivi lâi talle kirkko já kirhoh lijjii tievâ ulmuuh. Sun še juurdâš, ete taan äigi oovtâ oho markkâneh iä toimâččij.

– Puávtáččij tääbbin oho leđe, mutâ jurdám ete ij ohtâgin ookon pääsi teehin. Tääbbin lii suotâs eelliđ ko uáiná uápisulmuid. Tääl lii älkkee jotteeđ ko piäsá autoin, iätá Saijets.

Kuldâl eenâb onnáá Tiervâst.

Varrasamosat: Säämi

Váldoođđasat

Varrasamosat

Muualla Yle.fi:ssä