Sää´mjânnam |

Tâʹvv-Lääʹddjânnam vaaldšemvuõiǥâs heelǥii saaʹmi ouddooumažvaali vaaʹl-luʹvddkååʹdd tuʹmmstõõǥǥ piijjâd Veikko Feodorooff saaʹmi ouddooumžen

Tâʹvv-Lääʹddjânnam vaaldšemvuõiǥâs heelǥii saaʹmi ouddooumažvaali vaaʹl-luʹvddkååʹdd tuʹmmstõõǥǥ piijjâd Veikko Feodorooff saaʹmi ouddooumžen iiʹjjid 2018-2020.

Veikko Feodoroff
Veikko Feodoroff Govva: Vesa Toppari Yle / Yle

Tâʹvv-Lääʹddjânnam vaaldšemvuõiǥâs heelǥii saaʹmi ouddooumažvaali vaal-luʹvddkååʹdd tuʹmmstõõǥǥ piijjâd Veikko Feodorooff saaʹmi ouddooumžen mõõnni čâhčča.

Vaaldšemvuõiǥâs ǩeâčč, što saaʹmi ouddooumažvaali vaal-luʹvddkåʹdd lij ââʹlääm tuʹmmjõsvaaʹldees, ko lij heelǥääm Tanja Sanila da Sergei Fofonoff võboršeǩǩvuõđ tõʹnt, ko suäna jie vuässõõttâm nuõrttsääʹmǩiõllsilttõõzz ärvvtõõllampoʹdde.

Vaaldšemvuõiǥâs lij ǩiõččam, što Sanila da Fofonooff ǩiõllsilttõõzzâst leʹčči leämmaž nok tuõđštõs, ko kuhttu lie tuåimman ouddâl saaʹmi ouddommžen.

– Tän diõtt vaal-luʹvddkååʹdd tuʹmmstõõǥǥ Sanila da Fofonooff vaalââʹntemvuõđâst da Veikko Feodorooff vaʹlljummšest saaʹmi ouddooumžen feʹrttai kååʹmted, vuâđđââvv Tâʹvv-Lääʹddjânnam vaaldšemvuõiǥâs tuʹmmstõõǥǥâst.

Ǩii tuåimmai saaʹmi ouddooumžen ouddâl vaalid?

Tâʹvv-Lääʹddjânnam vaaldšemvuõiggâz tuʹmmstõõǥǥ diõtt puõtti čâhčča vueʹrdded ođđ saaʹmi ouddooumažvaalid.

Yle Sääʹmjânnam kõõjji vaaldšemvuõiggsest, što ǩii juätkkai saaʹmi ouddooumžen ââʹn, ko vaal-luʹvddkååʹdd 2017 mieʹrrõõzz nââneed Veikko Feodoroff saaʹmi ouddooumžen heelǥeeš.

Tâʹvv-Lääʹddjânnam vaaldšemvuõiǥâs uuʹdi kõskktuʹmmstõõǥǥes ǩeâđđa, mâʹst Veikko Feodoroff tuåimm saaʹmi ouddooumžen ouddâl loopplaž tuʹmmstõõǥǥ. Tâʹvv-Lääddjânnam vaaldšemvuõiggâz Minna Manninen mušttal Yle Sääʹmjânnma, što sij jie ouddâm ääʹššest tiuʹddepiijjmõštuʹmmstõõǥǥ jie-ǥa sij vueiʹt väʹldded pieʹll tõõzz, ǩii tuåimm Feodorooff sââʹjest nuõrttsäʹmmlai aaʹšši hoiʹddjeejen.

Tän ääʹššest ij leäkku seärad jeäʹǩǩääpeeiʹv räjja leämmaž seʹlvv, ǩii tuåimmai saaʹmi ouddooumžen. Tâʹvv-Lääʹddjânnam vaaldšemvuõiǥas ij väʹldd pieʹll äšša.

Tuâǥǥaz: Ǩiõllsilttõõzz ärvvtõõllâm võboršiiǩǩid jåʹttii vaiddlõsjoortõõǥǥ eʹpet saaʹmi ouddoummuvaalin

Vaal-luʹvddkåʹdd tuʹmmji mõõnni čõõuč saaʹmi ouddooumažvaali vueʹlnn, što saaʹmi ouddoummuvaalin 2017 leäi pâi õhtt vaalââʹntemvuõđlaž võboršeǩ, Veikko Feodoroff da nâânii suu ođđ saaʹmi ouddoummžen.

Saaʹmi ouddoummuvaal-luʹvddkåʹdd 2017 lij 7.7.2017 õnnum såbbrest tummjam, što tõn tuâjjan lij tuʹtǩǩeed ouddoummuvaalvõboršeeʹǩǩi vaalââʹntemvuõđ sääʹmǩiõl siltteem pirr še.

Sääʹmlääʹjj 46 § mieʹldd ouddooumaž da suu vääʹrrooumaž âʹlǧǧe leeʹd sääʹmvuuʹdest jälsteei sääʹmǩiõl siltteei 4 §:ast taarktum ooumaž, kååʹtt lij tuõjju põʹstti. Vaal-luʹvddkåʹdd tuʹmmji såbbrest 1.9.2017, što eeʹjj 2017 saaʹmi ouddoummuvaalvõboršeeʹǩǩi vaalââʹntemvuõđ taʹrǩǩummuš lij sami vääžnai jeäʹrbi mieʹldd vaal-luʹvddkååʹdd ouddlõs ouddoummuvaali õhttvuõđâst vuäǯǯam maacctõõzz diõtt, koon mieʹldd vaal-luʹvddkååʹdd âlgg taʹrǩǩeed võboršeeʹǩǩi vaalââʹntemvuõđ tääʹrǩben ko ääiʹjab.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä