Sää´mjânnam |

Tâʹvvjânnmallaš sääʹm ǩiõllciist Kåʹllǩiõll jueʹjjet čâhčča 2016

Tâʹvvjânnmallaš sääʹm ǩiõllciist Kåʹllǩiõll jueʹjjet čiiččâd vuâra 2016 sääʹmaaʹššin vaʹstteei miniʹsttri da sääʹmtiiʹğği saaǥǥtuõʹll’jeeji kaaunõõttmõõžžâst Tukholmast skamm-mannust. Ǩiõllciist jueʹjjet õhttnaž oummid leʹbe õhttõõzzid Taarrjânnmest, Ruõccjânnmest, Lääʹddjânnmest leʹbe Ruôššjânnmest sääʹmǩiõl ooudâsviikkâm õõudâst.

Gollegiella vuoitit.
Govva: A-M Ahlén/SVT Sápmi

Tâʹvvjânnmallaš sääʹm ǩiõllciist Kåʹllǩiõll jueʹjjet čâhčča 2016.

Ǩiõllciist lie aalǥtam Taarrjânnam, Lääʹddjânnam da Ruõccjânnam sääʹmaaʹššin vaʹstteei miniʹstter da täi jânnmi sääʹmtiiʹğği saaǥǥtuõʹll’jeei. Ciist juõʹǩǩe vuõss vuâra eeʹjjest 2004 da tõn jueʹjjet juõʹǩǩ nuuʹbb eeʹjj.

Cistt lij 15 000 euʹrred.

Ǩiõllciist mieʹrr

Ǩiõllciist mieʹrren lij miõđâld vaaikted sääʹm ǩiõl nâânummšâ, âânnmõʹšše da seillmõʹšše Taarrjânnmest. Ruõccjânnmest, Lääʹddjânnmest da Ruõššjânnmest.

Ǩiõllciist jueʹjjet õhttnaž oummid (ml. joukk) leʹbe õõutstõõzzid (ml. õhttõs, strooiteʹl), kook lie toimmjam miârkteeinalla sääʹm ǩiõl õõudeem, nââneem da seilltem beäʹlest.

Ǩiõllciist vueiʹtet uʹvdded ouddmiârkkân ǩeerjlaž, njäälmlaž leʹbe jeeʹres aaʹšši diõtt, kook käunnje veiddsânji jeeʹres toimmvuuʹdin. Ciist vueiʹtet jueʹǩǩed õõut vuäǯǯja, leʹbe tõn vueiʹtet jueʹǩǩed kuõiʹt cisttvuäǯǯai kõõsk.

Iʹlmmed jiijjad eeʹtǩõõzz!

Õhttnaž ooumaž, joukk leʹbe õõutstõs Taarrjânnmest, Ruõccjânnmest, Lääʹddjânnmest da Ruõššjânnmest vuäitt uʹvdded eeʹtǩõõzzâs eeʹjj 2016 ǩiõllciist vuäǯǯjen.

Eeʹtǩõs ǩiõllciist vuäǯǯjest da ǩeerjlaž vuâđd, jäänmõssân 1-2 seeid kookka, âlgg vuõltteed mââimõssân påʹrǧǧmânnu 25. peeiʹv 2016 mõõneeʹst addrõʹsse gollegiella@sametinget.se, Gollegiella, Box 90, SE-981 22 Giron/Kiruna, Sverige.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä