Sääʹmteeʹǧǧ sååbbar vaʹlljii sueʹvet ođđ saaǥǥjååʹđteei veeʹrjest räʹtkkjam Klemetti Näkkäläjärvi sâjja.
Sääʹmteeʹǧǧ vuässlaž Ilmari Tapiola eʹtǩǩii saaǥǥjååʹđteejen nuõrttsäʹmmlaž Tiina Sanila-Aikio Anne Nuorgam tuäʹrrjõõžžin. Vuässlaž Anu Avaskari eʹtǩǩii saaǥǥjååʹđteejen aanrõš Yrjö Musta.
Jiõnstumuužžâst Tiina Sanila-Aikio vuäǯǯai 12 jiõnned da Yrjö Musta 8 jiõnned.
Sanila-Aikio čieʹlǩi sååbbrest, što ođđ saaǥǥjååđteeʹjest lie jõnn vaǯǯtõõzz ooudâst, jeärben tõn diõtt, ko
Lääʹddjânnam sääʹmteeʹǧǧest lij äʹlǧǧmen saaʹmi parlamentaarlaž suåvtõõzz saaǥǥtuõʹlljeeivuõtt tän ǩeäđđa.
Sanila-Aikio sâjja vuõssmõs vääʹrrsaaǥǥtuõʹlljeejen vaʹlljeeš ouddlõs nuuʹbb vääʹrrsaaǥǥtuõʹlljeei Heikki Paltto. Nuuʹbb vääʹrrsaaǥǥtuõʹlljeejen vaʹlljeeš õõutmiõllsânji Ulla-Maarit Magga Enontekiöst.
