Sápmi |

Tomi Guttorm hálida lasihit váldoálbmoga áddejumi sápmelaččain – govve sámi eallima oahppomateriálan oahpaheaddjiide

Guttorm sávvá, ahte boahttevaš oahpaheddjiid skuvlen váikkuhivččii sápmelaččaid dillái boahttevuođas. Son ohcá lasi olbmuid veahkkin prošektii.

Tomi Guttorm
Tomi Guttorm. Govva: Ville-Riiko Fofonoff / Yle

Tomi Guttorm skuvle Oulus ámmátlaš oahpaheaddjiskuvllas boahttevaš oahpaheddjiid.

Okta oassi oahpaheaddjiskuvlla oahppoplánas lea máŋggakultuvralaš máhttu, muhto oahppoplánas ii lean mihkkege sámevuođas. Dan dihte álggahiige Guttorm prošeavtta, mas son govve iešguđetlágán sápmelaš eallinvugiid. Govat leat oaivvilduvvon oahppomateriálan boahttevaš oahpaheddjiide.

– Smihtten, ahte ferten gal dahkat juoidá. Ja go lean ieš sápmelaš ja mu mielas livččii hui dehálaš ahte min studeanttat, boahttevaš oahpaheaddjit dieđášedje vehá eambbo min kultuvrra birra.

Guttorm váldá prošeavtta várás hui iešguđetlágán govaid. Okta dehálaš temá su govain leat goittotge olbmot barggus.

– Lean govven olbmuid ja earálágan ealáhusaid dego boazodoalu, bivddu, duoji ja dakkár áššiid. Muhto govven maiddái eará fáttáid. Mu mielas lea dehálaš buktit oidnosii áigeguovdilis áššiid, mat leat dehálaččat midjiide.

Tomi Guttorma instagram-kontu.
Govva: Tomi Guttorm, Instagram

Tomi Guttorm ii váldde prošeavttastis dušše govaid, muhto baicce filbme maiddái oanehis jearahallamiid.

– Háliidan gullat, mii livččii olbmuid iežas sáhka min studeanttaide. Ahte mii sin geahččanguovllus livččii dakkár ášši, man min studeanttat fertešedje diehtit, Guttorm muitala.

"Sáhttá veahkehit min dili"

Guttorm álggahii prošeavtta mannan geasi. Dat oažžu su bealis bistit nu guhká go lea dárbu.

– Mus lea dakkár jurdda, ahte govvešin olles sámeguovllus ja mus eai leat vel nu olu olbmot Norgga, Ruoŧa ja Ruošša bealde. Ahte gal dat bistá vel guhká, muhto mus ii leat hoahppu. Mun ferten geavahit áiggi dán prošektii.

Guttorm sávvá, ahte dát prošeakta livččii okta vuohki buktit oidnosii sápmelaččaide dehálaš fáttaid ja áššiid. Son jáhkká, ahte boahttevaš oahpaheddjiid skuvlemiin sáhtášii oažžut dieđu leavvat viidásabbot.

– Dákkár diehtu lasiha olbmuid áddejumi ja dan láhkai maiddái sáhttá veahkehit min dili maiddái boahttevuođas, Tomi Guttorm smiehtada.

Sávašii lasi olbmuid prošektii

Tomi Guttorm muitala, ahte olbmot leat álgán mielde prošektii hui mielas, go leat gullan, mas das lea sáhka. Son goittotge sávašii vel lasi olbmuid veahkkin.

– Dieđusge doaivvun, ahte olbmuin livččii beroštupmi boahtit mielde dán prošektii. Mun dárbbašan dieđusge hui olu veahki, go barggan áibbas okto dainna prošeavttain.

Tomi Guttorma Insta-kontu
Govva: Tomi Guttorm, Instagram

Jus olbmuin bohtet millii áššit, maid váldoálbmot galggašii sin mielas diehtit, de Guttormii sáhttá váldit oktavuođa.

– Mun boađán hui millosit sámeguvlui dahje eará báikkiide, ja govven ja filbmen jearahallamiid.

Govat leat maiddái Instagram-bálvalusas

Oahpaheddjiid skuvlen ii leat prošeavtta áidna ulbmil. Tomi Guttorm almmustahttá oasi materiálainis maiddái Instagram-bálvalusas vai sámekultuvra oidnošii buorebut.

Tomi Guttorm Instagram-kontu
Govva: Tomi Guttorm, Instagram

– Mun háliidan Instagram bokte addit albma ja rivttes gova sámevuođas suopmelaš dahje davviriikkalaš medias. Dat livččii dego sápmelaš geahččanguovlu.

Guttorm proševtta govaid gávdná Instagram-bálvalusas fáddagilkoriin #respectsámiculture. Su Instagram-kontui beassá dás.

Tomi Guttorm lea mielde Dearvva!-radiosáddagis 2.8.2017.

Varrasamosat: Sápmi

Váldoođđasat

Varrasamosat

Muualla Yle.fi:ssä